अमरावती : तरुण शेतकऱ्याने बसंत ऍग्रोटेक कंपनीचे विक्रांत सोयाबीन बियाणे घेऊन 9 जुलैला पेरणी केली होती. एकाच दिवशी पेरणी झालेले शेजारी शेतातील बियाणे उगवले; मात्र मनीष कडू यांच्या शेतातील बियाणे उगवलेच नाही. याबाबतची तक्रार त्यांनी पंचायत समितीच्या कृषी अधिकाऱ्यांकडे केली. 

मात्र कृषी अधिकाऱ्यांनी तातडीने दखल न घेतल्याने उपविभागीय कृषी अधिकारी, जिल्हा अधीक्षक कृषी अधिकारी, पालकमंत्री यांच्याकडे मनीषने धाव घेतली. 

शास्त्रज्ञ चमूने केली शेताची पाहणी 

शास्त्रज्ञ चमूने शेताची पाहणी केली असता शेतकऱ्याने उशिरा तक्रार केल्याचे समजले. उगवलेल्या रोपांची संख्या लक्षात घेता बियाणे सदोष आहे किंवा नाही, असा अभिप्राय दिला होता. यावरून संतापलेल्या शेतकऱ्याने आत्मदहनाचा इशारा दिला होता.

संबंधित शेतकरी दुचाकीने कार्यालयात पोहोचताच त्याने घोषणा देणे सुरू केले. त्याने पोत्यात लपवून आणलेली रॉकेलची डबकी बाहेर काढण्यापूर्वी हवालदार छगन कडू, राजेंद्र काळे व अन्य दोन कर्मचाऱ्यांनी त्याला ताब्यात घेतले. 

 हेही वाचा की : जलयुक्त शिवार योजना गुंडाळणार?

प्रहार जनशक्ती पक्षाने विचारला जाब 

दरम्यान प्रहार जनशक्ती पक्षाचे पदाधिकारी चंदू खेडकर, छोटू महाराज वसू व अन्य कार्यकर्त्यांनी जिल्हा अधीक्षक कृषी अधिकारी विजय चवाळे यांना प्रशासकीय दिरंगाईचा जाब विचारत संबंधितांविरुद्ध कार्यवाहीची व शेतकऱ्याला
बियाणे कंपनीकडून नुकसानभरपाई मिळून देण्याची मागणी रेटून धरली. 

हेही वाचा की : मुलीच्या अंगावर पाणी सांडल्यावरून चाकूहल्ला

कार्यवाहीची शिफारस 

दरम्यान, जिल्हा अधीक्षक कृषी अधिकारी विजय चवाळे यांनी जिल्हा परिषदेचे मुख्य कार्यकारी अधिकारी आणि विभागीय कृषी सहसंचालक यांना पत्र पाठविले. शेतकऱ्याच्या तक्रारीच्या अनुषंगाने मोर्शीचे उपविभागीय कृषी
अधिकारी राहुल सातपुते आणि पंचायत समितीचे कृषी अधिकारी सुरेश औंधकर यांनी दुर्लक्ष व हयगय केल्याने त्यांना निलंबित करून त्यांच्यावर प्रशासकीय कार्यवाही करावी, असे या पत्रात प्रस्तावित केले आहे. सोबतच
शेतकऱ्याला सरासरी उत्पादकतेनुसार नुकसानभरपाईचे आदेश कंपनीस देण्यात आले.