वणी (जि. यवतमाळ) : रासा येथील 30 वर्षीय निलेश सुधाकर चौधरी याचा मृतदेह 29 ऑगस्टला गळफास घेतलेल्या अवस्थेत मिळाला होता. तब्बल 15 दिवसानंतर एक-एक रहस्याचा उलगडा करत पोलिसांनी (wani police yavatmal) आरोपींना जाळ्यात ओढले. मात्र, पत्नीनेच 'निलेश' च्या हत्येची (yavatmal crime) मास्टरमाइंड असल्याचे तपासात उघड झाली. आज 18 सप्टेंबरला मृतकाच्या पत्नीला ताब्यात घेत गुन्हा नोंद करण्यात आला आहे.

मृतक 'निलेश'चे लग्न मारेगाव तालुक्यातील नरसाळा येथे वास्तव्यास असलेल्या एका मुलीसोबत झाले होते. दोघांचा सुखी संसार सुरू असताना अनैतिकतेचे ग्रहण लागले. निलेशच्या पत्नीचे सूत मृतकाचा मेहुणा चंद्रशेखर दुर्गेसोबत जुळले. जवळचा नातेवाईक असल्याने त्याचा घरातील वावर कोणालाही संशयास्पद वाटत नव्हता. परंतु, अनैतिक संबंधाची कुणकुण कधीतरी लागतेच आणि तसेच घडले. निलेशला अनैतिक संबंधांबाबत कळताच तो प्रचंड हादरला. घटनेच्या 5 दिवसापूर्वी त्याचा पत्नीसोबत चांगलाच वाद झाला आणि तिला माहेरी नरसाळा येथे पाठवून दिले. या घडलेल्या घटनेमुळे सपना कमालीची संतापली आणि प्रियकराच्या मदतीने निलेश चा कायमचा काटा काढण्याचे ठरवले.

घटनेला आयाम देण्यासाठी चंद्रशेखर याने गावातीलच आशिष पिदूरकर, योगेश उघडे, गौरव दोरखंडे व एका विधी संघर्ष बालकाला आपल्या कटात सामील करून घेतले. अतिशय थंड डोक्याने हत्येची योजना आखली. घटनेच्या दिवशी निलेशला दारू पाजण्यात आली आणि त्या चौघांनी त्याचा करकचून गळा आवळला. लगतच असलेल्या झाडाला गळफास घेतल्याचा बनाव रचला.

पोलिसांनी घटनास्थळाचा पंचनामा केला आणि परिस्थितीजन्य पुराव्याच्या आधारे हत्येच्या दिशेने तपासाची रणनीती आखली. ठाणेदार शाम सोनटक्के व तपास अधिकारी आनंद पिंगळे व सहकाऱ्यांनी दि. 16 सप्टेंबर ला 4 आरोपींना ताब्यात घेतले. 2 दिवसाच्या पोलीस कोठडी दरम्यान पोलिसांना पत्नीच मास्टरमाइंड असल्याचे उघड झाल्याने शनिवारी पत्नीला पोलिसांनी ताब्यात घेऊन गुन्हा नोंद केला आहे.