वडकी (जि. यवतमाळ) : राळेगाव, कळंब व पांढरकवडा या तिन्ही तालुक्यातील जंगलनिहाय परिसरात वास्तव्य करणार्‍या शेकडो वन्यप्राणीग्रस्त शेतकर्‍यांचा दोन वर्षांपासून शेतीचा रोजगार हिरावल्याने आपले जीवन जगण्याचा अधिकार मिळविण्यासाठी, मानव व वन्यप्राणी या प्रश्नावर समाधानकारक तोडगा निघावा व आमचे आई-बाबा परत द्या या मागणीसाठी राळेगाव तालुक्यातील बोराटी येथे 11 नोव्हेंबर रोजी वन्यप्राणीग्रस्त शेतकरी संघर्ष समितीच्यावतीने शेतकरी स्वावलंबन मिशनचे अध्यक्ष किशोर तिवारी यांनी एका मेळाव्याचे आयोजन केले होते.

या मेळाव्याला पालकमंत्री मदन येरावार, राळेगाव विधानसभा क्षेत्राचे आमदार डॉ. अशोक उईके, जिल्हा परिषद उपाध्यक्ष श्याम जैस्वाल, जि.प. सदस्य चित्तरंजन कोल्हे, उषाताई भोयर, सौ काकडे, पंचायत समिती सदस्य प्रशांत तायडे उपस्थित होते. यावेळी ज्या तेरा निष्पाप आदिवासी शेतकरी शेतमजुराचा या वाघिणीच्या हल्यात बळी गेला त्या कुटूंबातील सदस्यांना सरकारी नोकरी तसेच वाघीणग्रस्त गावात सरसकट प्रतिकुटूंब दोन लाखांची मदत देण्यात यावी, या प्रमुख मागणीसह विविध मागण्यांचे मागणी पत्र पालकमंत्री मदन येरावार यांना देण्यात आले. दरम्यान, पालकमंत्री येरावार यांनी मी प्रत्येकाला नोकरी देउ असे वचन देवू शकत नसल्याने कौशल्य विकासाच्या माध्यमातून ज्यांचे अंगी स्वत:चे पायावर उभे राहण्याची जिद्द असेल व पैशाअभावी अडचण निर्माण होत असेल अशांना कौशल्य विकासाच प्रशिक्षण देवून शासनाच्या मूद्रा योजनेसह अन्य योजनेतून प्राधान्य देवून त्यांचे कुटूंब स्वताचे पायावर उभे राहील असा प्रामाणिक प्रयत्न केला जाईल असे आश्वासन दिले. 

यावेळी शेतकरी स्वावलंबन मिशनचे किशोर तिवारी यांचेसह राळेगाव विधानसभा क्षेत्राचे विद्यमान आमदार अशोक उईके, मोहदा येथील उपसरपंच विजय तेलंगे, झाडगांव येथील अशोक केवटे यांनी सुद्धा आपले मत व्यक्त केले. यावेळी अवनी या वाघिणीच्या दहशतीतून मुक्त केल्याने वनविभागाच्या महीला अधिकारी के एम अर्भणा यांचे अशोक केवटे व वाघिणीच्या हल्यात मृत्यू मूखी पडलेल्या कुटूंबातील सदस्यांनी पुष्पगुच्छ देऊन आभार मानले. या कार्यक्रमाला वनविभागाचे विभागीय व्यवस्थापक प्रफुल्ल एन वाघ, महसूल विभागाचे नायब तहसीलदार विलास दूधपोळे, वीर, कृषि विभागाचे तालूका कृषी अधिकारी संजय पाठक, राळेगावचे माजी नगराध्यक्ष बबनराव भोंगारे, अॅड प्रफुल्ल चव्हाण, भा ज पा राळेगाव तालुकाध्यक्ष बाळासाहेब कविश्वर, डॉ कुणाल भोयर, जिल्हा परिषद सदशया प्रीती काकडे संजय काकडे डॉ अक्षय जव्हेरी, वन्य प्राणी ग्रस्त गावाचे सरपंचासह शेकडो नागरिकांनी उपस्थित होते.