मूल (जि. चंद्रपूर) : जंगलात मोहफुले वेचण्यासाठी गेलेल्या महिलेवर वाघाने हल्ला करून ठार केले. ही घटना बुधवारी सकाळी ११ वाजताच्या सुमारास घडली. कल्पना नामदेव वाढई (वय ५४) मृत महिलेचे नाव आहे. 

हेही वाचा - खरेदी, विक्रीच्या व्यवहारात महिलांना १ टक्का सूट; मात्र, करावे लागणार या नियमांचे पालन

जंगलात सध्या सर्वत्र मोहफुले आली आहेत. ग्रामीण भागात मजुरी नसल्यामुळे गावकरी मोहफुले वेचून त्यावर कुटुंबाचा उदरनिर्वाह करतात. आगडी येथील कल्पना वाढई आणि तिची आई कौशल्या मांदाळे गावाला लागूनच असलेल्या जंगलात मोहफुले वेचायला गेल्या. मोहफुले खूप उशिरापर्यंत पडतात. त्यामुळे कल्पनाची आई कौशल्या मांदाळे जेवायला घरी आली. त्यानंतर कल्पना येणार होती. मात्र, बराचवेळ लोटूनही कल्पना घरी आली नाही. त्यामुळे आईने नातवाला कल्पनाला बोलविण्यासाठी पाठविले. नातवाने जंगलात जाऊन शोधाशोध केली. मात्र, त्याचा काहीच फायदा झाला नाही. त्यामुळे तो गावकऱ्यांना घेऊन जंगलात गेला. तेव्हा कक्ष क्रमांक ११५ मध्ये कल्पनाचा मृतदेह आढळून आला. त्यानंतर घटनेची माहिती वनविभागाला देण्यात आली. वनपाल प्रशांत खनके, वनरक्षक राकेश गुरनुले, पठाण, पंचायत समिती सदस्य वर्षा लोनबले, दामोधर लेनगुरे यांनी घटनास्थळी भेट दिली.