हिंगणघाट (जि. वर्धा) : एका गर्भवतीला पहाटेच्या वेळी दोन अनोळखी स्त्रियांनी घरून बाहेर नेत बाळंतपण करून नवजात अर्भक घेऊन पळाल्याचे प्रकरण पोलिसांत पोहोचल्यावर त्या महिलेने झालेला गर्भपात लपविण्यासाठी स्वतःच षड्‌यंत्र रचल्याचे पोलिस तपासात उघडकीस आले आहे. शहरातील शास्त्री वॉर्ड येथील ही घटना आहे. 

हेही वाचा - एका दणक्यात अख्खा दरवाजा तोडणारा 'दया' आता देणार वाहतूक नियम पाळण्याचा...

ही विवाहिता गर्भवती असताना काही महिन्यांपूर्वीच तिचा गर्भपात झाला. मात्र, ही बाब तिने भीती पोटी कुटुंबापासून लपवून ठेवली होती. प्रसूतीची वेळ जवळ येत असल्याचे पाहून तिने नाट्य रचले. कोणीतरी जादूटोणा केल्यानेच हा प्रकार घडला असून दोन अनोळखी महिलांनी बुधवारच्या पहाटे येऊन या विवाहितेला घराबाहेर नेले. 

अज्ञातस्थळी बाळतपण झाल्यावर तिचे नवजात अर्भक पळविल्याचा व कोणीतरी जादूटोणा केल्यानेच हा प्रकार घडल्याचा बनाव तिने पती व कुटुंबीयांना सांगितला. त्यामुळे घाबरलेल्या कुटुंबाने तिला स्थानिक उपजिल्हा रुग्णालयात दाखल केले. 

सदर महिलेची वैद्यकीय तपासणी केली असता त्या महिलेचे जवळच्या काळात बाळंतपण झाल्याचे कोणतेही लक्षण आढळून आले नाही. परंतु त्या महिलेची मानसिक स्थिती असंतुलित असल्याने तिला जिल्हा रुग्णालयात उपचारासाठी हलविण्यात आले, अशी माहिती उपजिल्हा रुग्णालयाचे अधीक्षक डॉ. किशोर चाचरकर यांनी दिली.

जाणून घ्या - 'आई या जगात नाही आता जागून काय करू?'  नैराश्यातून युवकानं संपवली जीवनयात्रा; अख्ख्या...

दरम्यान, हे प्रकरण पोलिसांत गेल्याने पोलिसांनी कसून चौकशी केली असता ही मनघडन घटना असल्याचे तपासात उघडकीस आल्याची माहिती ठाणेदार संपत चौहान यांनी दिली.

संपादन - अथर्व महांकाळ