Vidarbh Rain : अनेक दिवसांपासून दडी मारलेल्या पावसाने अखेर मागच्या एका आठवड्यापासून चांगलीच हजेरी लावली आहे. महाराष्ट्रातील विविध भागांत मुसळधार पावसामुळे अनेकांचे नुकसान झाले आहे. तर विदर्भातील अकोला, बुलढाणा, यवतमाळ जिल्ह्यात संततधार पावसामुळे पूर परिस्थिती निर्माण झाली आहे. यवतमाळ जिल्ह्यातील पावसामुळे झालेल्या नुकसानीचा व्हिडिओ सोशल मीडियावर चांगलाच व्हायरल झाला आहे.

यवतमाळ जिल्ह्यातील राळेगाव तालुक्यात अतिवृष्टीमुळे ओढे आणि नद्यांना पूर आला आहे. त्यामुळे शेतमालांचं नुकसान झालं असून अनेक घरात पाणी घुसलं आहे. काही शेतकऱ्यांनी नुकतेच लागवड केलेले पीकही वाहून गेले, त्यामुळे सोयाबीन, कापसाचे नुकसान झाले. त्याचबरोबर कंबरेएवढे पाणी घरात आल्यामुळे अनेक नागरिकांना स्थलांतर करावे लागले आहे. तर अनेकजण उघड्यावर सामान घेऊन थांबल्याचं दिसत आहे.

दरम्यान, समोर आलेल्या व्हिडिओमध्ये रस्त्यावर पूरपरिस्थिती निर्माण झाल्याचं दिसत असून वाहून जाणाऱ्या वस्तू वाचवण्यासाठी नागरिकांचे प्रयत्न सुरू आहेत. तर रस्त्या ओलांडण्यासाठी नागरिक मोठ्या दोराचा वापर करत आहेत. घाबरवून टाकणारी ही दृश्ये पाहून आपल्यालाही धक्का बसेल.