आर्णी : तालुक्यातील बोरगाव येथे महिलेच्या खून प्रकरणात अटक करण्यात आलेल्या आरोपीकडून चोख पोलिस बंदोबस्तात इन कॅमेरा खुनाचे प्रात्यक्षिक करण्यात आले. रविवारी (ता.25) प्रात्यक्षिकादरम्यान खुनात वापरण्यात आलेली सुरी, रक्ताने माखलेले कपडे पोलिसांनी जप्त केले.

सुनीता दत्ता मुधळकर (वय 50, रा. बोरगाव) या महिलेच्या घरात प्रवेश करून सुनील प्रकाश जाधव (वय 30, रा. बोरगाव) याने शारीरिक सुखाची मागणी केली. महिलेने त्यासाठी नकार दिल्याने रागाच्या भरात खून केला.

बाबाराव निबोळे (वय 38) याच्या तक्रारीवरून आर्णी पोलिस ठाण्यात गुन्हा नोंदविण्यात आला. पोलिसांच्या प्राथमिक तपासात मारेकरी घराशेजारी राहणारा सुनील जाधव असल्याचे निष्पन्न झाले.

शनिवारी (ता.24) पांगरी जंगल शिवारातून त्याला अटक करण्यात आली. न्यायालयाने बुधवारपर्यंत (ता.27) पोलिस कोठडी सुनावली. रविवारी दुपारी साडेतीन वाजता पोलिस बंदोबस्तात मारेकर्‍याला गावात आणण्यात आले. कशाप्रकारे घरात प्रवेश करून खून केला, याचे प्रात्यक्षिक इन कॅमेरा करून घेण्यात आले.

गुन्ह्यात वापरण्यात आलेली धारदार सुरी व रक्ताने माखलेले कपडे जप्त करण्यात आले. प्रात्यक्षिकादरम्यान ग्रामस्थांनी घटनास्थळी मोठ्या प्रमाणात गर्दी केली होती. यावेळी सहायक पोलिस निरीक्षक सुनील पाटील, पोलिस उपनिरीक्षक शिवराज पवार, सतीश चौधार, विशाल गावंडे, योगेश सुकलवार, अशोक टेकाळे, अरविंद चिमटे, अतुल पवार उपस्थित होते.

झोपडीत रात्रभर मुक्कामी

महिलेचा खून केल्यावर सुनील जाधव याने गावात पोलिस येणार या भीतीने पोबारा केला. बोरगावातून पायी कारेगाव पारधी बेडा येथे एका झोपडीत गेला व रात्रभर तेथेच मुक्काम ठोकला. शनिवारी सकाळी शेतशिवारासह जंगल शिवार फिरत निघाला. पिपरी शिवारात गुराखी एकत्र बसून जेवणासाठी थांबतात, तेथे आला. त्यांच्याजवळची भाकर जेवला. त्यानंतर पांगरी दाभडी जंगलातील पांदण रस्त्याने निघाला. याची माहिती जमादार मनोज चव्हाण यांना मिळताच त्यांनी मोठ्या शिताफीने त्याला अटक केली.