नागपूर - अडथळ्यांवर मात करून समाज व देशासाठी रचनात्मक काम करणाऱ्या तरुणांचा डिलिव्हरिंग चेंज फाउंडेशनचे ‘यंग इन्स्पिरेटर्स नेटवर्क’ (यिन) युवा व्यासपीठ ‘यूथ इन्स्पिरेटर्स अवॉर्ड- २०१९’ देऊन गौरव करणार आहे. सात विविध क्षेत्रांमध्ये उत्तम काम करणाऱ्या युवकांचे कौतुक व्हावे व इतर युवकांसाठी यातून प्रेरणा मिळावी, या हेतूने हे पुरस्कार दिले जाणार आहेत. 

शैक्षणिक, सामाजिक व व्यावसायिक विकासावर लक्ष केंद्रित करताना समाज व देशासाठी रचनात्मक काम उभे करण्यास प्रेरणा मिळावी, यासाठी ‘यिन’ने महाविद्यालयीन तरुणांसाठी आयोजित केलेल्या ‘यिन समर यूथ समिट’च्या निमित्ताने हे गौरव होणार आहेत. संपूर्ण विदर्भासाठी १२ व १३ जून ला ही परिषद रेशीमबागेतील कविवर्य सुरेश भट सभागृह येथे होणार आहेत. प्रत्येक विभागात ही पारितोषिके देण्यात येणार आहेत. कम्युनिटी सर्व्हिस, सामाजिक सेवा, कला आणि सांस्कृतिक, क्रीडा, शिक्षण, विज्ञान-तंत्रज्ञान-अभियांत्रिकी, एक्‍सलन्स इन यूथ लीडरशिप आणि उद्योग-स्टार्ट अप क्षेत्रांसाठी हे पुरस्कार देण्यात येणार आहेत. या पुरस्कारांसाठी नामांकने मागवण्यात येत आहेत. सात  क्षेत्रांमधील १८ ते ३० वयोगटांतील युवक-युवती या पुरस्कारांसाठी ९ जूनपर्यंत अर्ज करू शकतात. ‘यिन समर यूथ समिट’मध्ये सहभागी होणाऱ्या विद्यार्थ्यांना विविध क्षेत्रांतील नामांकित व्यक्ती व तज्ज्ञांना भेटायची, तसेच विविध कार्यशाळा आणि प्रशिक्षण सत्रांमध्येही सहभागी होण्याची संधी मिळणार आहे.