वणी (जि. यवतमाळ) : आपल्या घराशेजारीच असलेल्या नळावर पाणी भरण्यासाठी गेलेल्या एका विवाहित तरुणीवर अत्याचार झाल्याची घटना शुक्रवारी (ता. ३०) उघडकीस आली. याबाबतची फिर्याद पीडित विवाहितेने वणी पोलिस ठाण्यात दिली आहे.

त्यावरून एका तरुणाविरुद्ध गुन्हा दाखल करण्यात आला. प्रकरणी पोलिसांनी त्याला अटक केली. या घटनेने एकच खळबळ उडाली आहे.

बळजबरीने ओढून नेले घरात

शहरातील सेवानगर परिसरात वास्तव्यास असलेली विवाहिता गेल्या मंगळवारी (ता. २७) नळावर पाणी भरण्यासाठी गेलेली होती. त्यावेळी संशयित आरोपी चेतन भटवलकर (वय २०, रा. सेवानगर, वणी) याने विवाहितेला बळजबरीने घरात ओढून तिच्यावर अत्याचार केल्याचे पीडितेने वणी पोलिस ठाण्यात शुक्रवारी (ता. ३०) दिलेल्या तक्रारीत म्हटले आहे.

अवश्य वाचा : मेळघाटच्या भरारी पथकातील डॉक्‍टरांसह रुग्णांचा जीव धोक्‍यात; खिळखिळ्या वाहनाचा होतोय उपयोग

पीडितेने केली पोलिस ठाण्यात तक्रार

मंगळवारी घडलेल्या या अनपेक्षित प्रकारानंतर कमालीची घाबरलेल्या विवाहितेने दोन दिवसांनंतर म्हणजे शुक्रवारी घडलेला प्रकार आपल्या पतीला सांगितला. त्यानंतर दोघांनी थेट वणी पोलिस ठाणे गाठून रीतसर तक्रार दाखल केली.

जाणून घ्या : यवतमाळ पोलिसांची उडाली झोप! सहायक पोलिस निरीक्षकाची पिस्टल चोरणारा आठवडा उलटूनही मोकळाच

आरोपीविरुद्ध गुन्हा दाखल

पीडितेच्या तक्रारीवरून पोलिसांनी संशयित आरोपी चेतन भटवलकरविरुद्ध गुन्हा नोंद केला आहे. संशयिताला ताब्यात घेण्यात आले असून, पीडितेला वैद्यकीय चाचणीसाठी यवतमाळ येथील जिल्हा सामान्य रुग्णालयात पाठविण्यात आले आहे. या घटनेचा तपास पोलिस करीत आहेत.

(संपादन : दुलिराम रहांगडाले)