अमरावती : बारा वाजता भेटायला ये, न भेटल्यास ऍसिड हल्ला करेल, अशी धमकी युवकाने विवाहितेला दिली. नांदगावखंडेश्वर तालुक्‍यातील एका गावात ही घटना घडली. मंगरुळचव्हाळा ठाण्यात प्राजक्त देशमुख (वय 32) या युवकाविरुद्ध पोलिसांनी या प्रकरणात गुन्हा दाखल केला. गुन्हा दाखल होताच त्याने गावातून पळ काढला.

एका विवाहितेसोबत त्याची जुनी ओळख होती. तिचा मोबाईल क्रमांक असल्याने तो तिला अनेकदा फोनसुद्धा करीत होता. त्याने महिलेशी जवळीक साधण्याचा प्रयत्न सुरू केला. त्याचा हेतू महिलेच्या लक्षात येताच तिने त्याला टाळण्याचा प्रयत्न सुरू केला. अखेर त्याने गावात जाऊन पीडितेला गाठले. फोनवर संपर्क करूनही का प्रतिसाद देत नाही, याबद्दल जाब विचारला.

तिला मध्यरात्री 12 वाजता भेटायला येण्याचा निरोप दिला. भेटीसाठी न आल्यास ऍसिड हल्ला करून हत्या करण्याची त्या युवकाने तिला धमकी दिली. शिवीगाळ केली, असा आरोप पीडितेने मंगरुळचव्हाळा ठाण्यात दाखल तक्रारीत केला. आपल्या विरुद्ध तक्रार दिल्याची कुणकूण लागताच प्राजक्त फरार झाल्याचे पोलिस अधिकाऱ्यांनी स्पष्ट केले.

अवश्य वाचा - पत्नीच्या जळत्या चितेवर पतीची उडी, सुखी जीवनाचा दुर्दैवी अंत

तो म्हणाला.. जंगलमे जायेंगे!

धारणी तालुक्‍यातील एक 18 वर्षीय युवती एकटी बकऱ्या चारत असल्याचे बघून रवी धिकार (रा. चिंचोली) हा दुचाकी घेऊन तिच्याजवळ गेला. तिला जंगलमे जायेंगे अशी ऑफर दिली. युवतीने त्याला नकार दिला. पीडितेच्या तक्रारीवरून धारणी पोलिसांनी रवीविरुद्ध विनयभंगाचा गुन्हा दाखल केला.