अमरावती : काही दिवसांपासून द्विधा मन:स्थितीत असलेल्या युवकाने रविवारी (ता. सात) सायंकाळी स्वत:च्या घरात जाळून घेतले. उपचारादरम्यान रात्री त्याचा इर्विन रुग्णालयात मृत्यू झाला. स्वप्नील हरिभाऊ बुरघाटे (वय 37) असे आत्महत्या करणाऱ्या व्यक्तीचे नाव आहे.

स्वप्नीलने रविवारी सायंकाळी सातच्या सुमारास घरी स्वत:ला एका खोलीत कोंडून जाळून घेतले. तो 85 टक्के भाजला. त्याला उपचारासाठी जिल्हा सामान्य रुग्णालयात दाखल करण्यात आले, मात्र उपचारादरम्यान रात्री अकराच्या सुमारास स्वप्नीलचा मृत्यू झाला, अशी माहिती नांदगावपेठ पोलिसांनी दिली. स्वप्नील एम.आर. म्हणून नोकरी करीत होता. त्याचे लग्न झाले होते.

संबंधित जिल्हा : अमरावती जिल्ह्यात चोवीस तासात अपघातात तिघे ठार, जखमींमध्ये दोन लहान मुलेही

काही दिवसांपासून पती-पत्नीच्या कौटुंबिक वादाच्या खटल्याची सुनावणी न्यायालयात सुरू आहे. त्यामुळे स्वप्नील सतत तणावात होता. द्विधा मन:स्थितीमुळे त्याने हे टोकाचे पाऊल उचलले, अशी माहिती मृत युवकाच्या कुटुंबीयांनी पोलिसांना दिल्याचे नांदगावपेठचे पोलिस निरीक्षक दिलीप चव्हाण यांनी सांगितले. या प्रकरणात पोलिसांनी अकस्मात मृत्यू अशी नोंद घेतली. सोमवारी (ता. आठ) उत्तरीय तपासणीनंतर मृतदेह नातेवाइकांच्या स्वाधीन करण्यात आला.