राज्य सरकारची महत्वाकांक्षी माझी लाडकी बहिण योजना विरोधकांच्या रडारवर आली आहे. यावरून अजित पवारांनी विरोधकांना चांगलंच सुनावलं. अजित पवार यांनी ट्विट करत लाडकी बहिण योजनेवरून विरोधकांवर निशाणा साधला. तसेच लाडक्या बहिणीला वाढीव निधी मिळवण्यासाठी प्रयत्न करणार असल्याचंही अजित पवार यावेळी म्हणाले.

आपल्या ट्विटमध्ये उपमुख्यमंत्री अजित पवार म्हणाले की, "'माझी लाडकी बहीण योजना' टिकवणं शक्य नसल्याचं विरोधी पक्ष सांगत आहेत. परंतु अशक्य गोष्ट शक्य करणं हीच माझी ओळख आहे. तोच माझा स्वाभिमान आहे. ही कल्याणकारी योजना विरोधकांना बंद पाडायची आहे, तसं त्यांनी स्पष्ट देखील केलं आहे कारण, ही योजना यशस्वीपणे राबवणं अशक्य आहे असं त्यांचे भाकित आहे. परंतु येत्या काळात या योजनेला अधिक बळकटी देवून या योजनेची रक्कम वाढवण्यासाठी मी सर्वोतोपरी प्रयत्न करेन. ही निवडणूक महिलांच्या हितासाठी आणि विरोधात असणाऱ्यांमध्ये आहे."