Share Market : पीएनबीचे शेअर्स 21 महिन्यांच्या रेकॉर्डवर, सरकारच्या एका निर्णयाने शेअर्समध्ये तेजी....

मुंबई : पंजाब नॅशनल बँकेचे (Punjab National Bank) शेअर्स शुक्रवारी जवळपास 8 टक्क्यांनी वाढून बीएसईवर 55.65 रुपयांच्या इंट्रा-डे उच्चांकावर पोहोचले. फेब्रुवारी 2020 नंतरचा हा विक्रमी उच्चांक आहे.

सरकारच्या एका मंजुरीमुळे बँकेच्या शेअर्सची खरेदी वाढली. यूटीआय ऍसेट मॅनेजमेंट कंपनीमधील (UTI AMC) तिचा संपूर्ण हिस्सा पीएनबीला विकण्यास सरकारने मान्यता दिली आहे. या निर्णयामुळे यूटीआय एएमसीच्या शेअर्समध्येही तेजी दिसून आली. युटीआय एमएससीचे शेअर्स शुक्रवारी इंट्रा-डेमध्ये सात टक्क्यांनी वाढून 751.2 रुपयांवर पोहोचले

युटीआय एएमसीमधील संपूर्ण हिस्सा विकण्यासाठी बँकेला DIPAM अर्थात डिपार्टमेंट ऑफ इन्व्हेस्टमेंट अँड पब्लिक ऍसेट मॅनेजमेंटकडून मंजुरी मिळाल्याचे पीएनबीने स्टॉक एक्सचेंजला कळवले आहे.

DIPAM हा वित्त मंत्रालयाचा एक विभाग आहे जो केंद्र सरकारच्या इक्विटी गुंतवणुकीशी संबंधित काम करतो. पीएनबीची युटीआय एएमसीमध्ये 15.22 टक्के हिस्सेदारी आहे आणि त्याला संपूर्ण स्टेक विकण्याची परवानगी देण्यात आली आहे. युटीआय एएमसीमध्ये बँकेची हिस्सेदारी सुमारे 1,300 कोटी रुपयांची आहे.

केअर रेटिंग्सने (CARE Ratings) बँकेच्या AT-1, टियर 2 बाँड्स आणि इन्फ्रास्ट्रक्चर बॉन्ड्सचे रेटिंग स्टेबलवरून पॉझिटिव्ह केले आहे. केअर रेटिंगच्या विश्लेषकांनी पीएनबीला सरकारी सपोर्ट मिळत राहील अशी अपेक्षा व्यक्त केली आहे. पीएनबीमध्ये सरकारची 73.15 टक्के हिस्सेदारी आहे. व्यवसायाच्या दृष्टीने ही देशातील सार्वजनिक क्षेत्रातील दुसरी सर्वात मोठी बँक आहे.

नोंद : क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.