Raksha Bandhan 2023: 31 ऑगस्टचाही रक्षाबंधनाचा मुहूर्त हुकलाय का? कधी बांधावी राखी, जाणून घ्या सविस्तर

Raksha Bandhan 2023 : राखी पौर्णिमेचा सण यंदा भद्र काळाच्या सावटामुळे ३० ऑगस्ट आणि ३१ ऑगस्ट या दोन दिवस साजरा करण्यात आला. पण काही कारणास्तव बहुतांश जणांना या दोन्ही दिवशीही हा सण साजरा करणं जमलंच नसल्याचे ऐकण्यास मिळत आहे.

मग आता रक्षाबंधन सण साजरा करावा की करू नये, याबाबत तुमचा गोंधळ उडाला आहे. पण चिंता करू नका. कारण ३१ ऑगस्टला ठराविक कालावधीदरम्यान तुम्ही भावाच्या मनगटावर राखी बांधू शकता. 

श्रावणी पौर्णिमा 

३१ ऑगस्टला श्रावणी पौर्णिमा देखील साजरी केली जाणार आहे. त्यामुळे ३१ ऑगस्टलाही आपण रक्षाबंधन सण साजरा करू शकता. या दिवशी भक्तगण उपवासही करतात, तशी परंपरा आहे. महत्त्वाचे म्हणजे आज दुपारी राहू काळ देखील सुरू होणार आहे. दुपारी १ वाजेदरम्यान ते दुपारी ३.३३ वाजेपर्यंत राहू काळ असणार आहे. त्यामुळे या काळात भावाला राखी बांधणे टाळावे.   

कसे करावे औक्षण?

कोणत्याही महत्त्वाच्या कार्यासाठी औक्षण करणे शुभ मानले जाते. राखी बांधण्यापूर्वीही भावाचे औक्षण करण्याची परंपरा आहे. त्यामुळे औक्षणाच्या थाळीमध्ये चंदन, अक्षता, हळद-कुंकू, नारळ, दिवा, मिठाई या सर्व गोष्टी ठेवाव्यात. 

• सर्व प्रथम भावाच्या कपाळावर टिळा लावावा.

• यानंतर भावाची आरती ओवाळावी. 

• आरतीनंतर भावाला राखी बांधून मिठाई भरवावी आणि त्यांच्या उदंड जीवनासाठी देवाकडे प्रार्थना करावी.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.