Shravani Somvar : श्रावणी सोमवारी येतोय सोमप्रदोष; या दुहेरी योगावर असे करा व्रत, सर्व संकटांवर कराल मात

Shravani Somvar And Som Pradosh Vrat :

प्रदोष म्हणजे त्रयोदशीला सूर्यास्तानंतर रात्र होण्याच्या पूर्वीचा कालावधी म्हणजे प्रदोष काळ. यंदा हा काळ श्रावणी सोमवारी येत आहे. सोमवारी येत असल्याने याला सोमप्रदोष म्हटले जाते. या काळात पूजा करणे अधिक शूभ मानले जाते. हा श्रावणी सोमवार असल्याने या तिथीचे महत्व दुपटीने वाढले आहे. त्यामुळे यानिमित्त तिळाची शिवामूठ वाहून सोम प्रदोषाचे व्रत करा.

प्रदोष व्रत वारानुसार वेगवेगळे फळ देणारे असते. सोम प्रदोष व्रत केल्यामुळे भाग्य, आरोग्य, संपत्ती, आनंद, शांती, प्रेम, कर्जमुक्ती आणि बरेच शुभ परिणाम मिळतात तसेच सर्व इच्छांची पूर्तता होते, असं मानलं जातं. सोम प्रदोषाच्या दिवशी भगवान शिव, देवी पार्वती, भगवान गणेश आणि कार्तिकेय यांची पूजा केली जाते.

पौराणिक कथा

असे म्हणतात, की हे व्रत सर्वप्रथम चंद्र देवाने केले होते. त्याला क्षयरोग झाला होता. भगवान शिवाला प्रसन्न करून त्याने दिसामासाने कमी होण्याबरोबर दिसामासाने वृद्धिंगत होण्याचा वर मागून घेतला. या कथेतून प्रेरणा घेऊन आपणही सोम प्रदोषाच्या दिवशी उपास करुन पूजा करावी व संध्याकाळी फळे व दुधाचा नैवेद्य दाखवून उपास सोडावा. 

आणखी एक कथा

एक विधवा स्त्री स्वतःचे व मुलाचे पालन पोषण करण्यासाठी दारोदार भीक मागत असे. मिळालेल्या अन्नातून दोघांचे पोषण होत असे. एक दिवस भीक मागत फिरत असताना तिला जखमी अवस्थेत एक मुलगा सापडला. तिला त्या मुलाची दया आली. तिने त्याला आपल्या सोबत झोपडीत नेले.

त्यालाही घासातला घास खाऊ घातला. तो मुलगा बरा झाला. त्याने स्वतःची ओळख पटवून दिली. तो एका राज्याचा राजकुमार होता. परंतु शत्रूने त्याच्या राज्यावर आक्रमण करून त्याच्या वडिलांना बंदिवान केले होते. आणि त्याला राज्यातून हाकलून दिले होते. म्हणून त्याची दुरावस्था झाली होती. 

एकदा एका गंधर्व कन्येचा राजकुमाराशी परिचय झाला आणि ती त्याच्या रूपावर लुब्ध झाली. त्याच्याशी लग्न करण्याचा तिने मनोदय व्यक्त केला. तिने आपल्या माता पित्याला तसे सांगितले. त्याची पूर्ण चौकशी करून गंधर्व कन्येच्या माता पित्याने आपल्या कन्येचा विवाह लावून दिला. आपले सैन्य राजपुत्राला देऊन शत्रूशी लढा करण्याचे बळ दिले.

राजकुमाराने आपले राज्य परत मिळवले. आई वडिलांची तुरुंगातून सुटका केली आणि ज्या स्त्रीने त्याला मदतीचा हात दिला होता, त्या स्त्रीचा राजपुत्राने सांभाळ केला आणि तिच्या मुलाला भविष्यात राज्यच्या प्रधान पद बहाल केले. ती स्त्री कायम प्रदोष व्रत भक्ती भावाने करत असल्यामुळे तिचे दिवस पालटले आणि नशिबात अनपेक्षितपणे राजयोग आला. 

सोमप्रदोष व्रताचा मुहूर्त

दिनांक २८ ऑगस्ट संध्याकाळी ७ वाजून १० मिनीटे ते ८ वाजून ३० मिनीटे.

पूजा विधी -

• या दिवशी भाविकांनी सूर्योदयाआधी उठून स्नान करावे.

• घर स्वच्छ करावे.

• देवपूजा करावी.

• शिवलिंगावर बेल व्हावे.

• जमल्यास दूध पाण्याने अभिषेक करावा आणि ओम नमः शिवाय या मंत्राचा जप करावा.

• महाकाल शंकराच्या महामृत्यूंजय जपाचेही पठण करावे.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.