Arvind Kejriwal : केजरीवालांना ‘इन्शुलिन’ दिले जात नसल्याचा आरोप

नवी दिल्ली ः ‘‘दिल्लीचे मुख्यमंत्री अरविंद केजरीवाल यांची तुरुंगात हत्या करण्याचा कट रचण्यात आला असून मधुमेह असूनही त्यांना इन्शुलिनचे इंजेक्शन दिले जात नाहीये’’ असा आरोप आम आदमी पक्षाकडून(आप) रविवारी करण्यात आला. मधुमेहावर उपचार करणारे डॉक्टर केजरीवाल यांच्यासाठी उपलब्ध करून द्यावेत, अशी मागणीही ‘आप’ नेते सौरभ भारद्वाज यांनी पत्रकारांशी बोलताना केली.

तिहार तुरुंगात सामान्य आजारांवर उपचार करणारे डॉक्टर आहेत. तेथे मधुमेहावर उपचार करणारे डॉक्टर नसल्याचे तुरुंग प्रशासनाने ‘एम्स’ रुग्णालयाला पाठवलेल्या पत्राद्वारे स्पष्ट झाले आहे, असे सांगून भारद्वाज म्हणाले की, दिल्लीच्या लोकांनी निवडून दिलेल्या मुख्यमंत्र्याला इन्शुलिनपासून वंचित ठेवले जात आहे. केजरीवाल यांना वीस वर्षांपासून मधुमेह आहे. मागील १२ वर्षांपासून ते इन्शुलिन घेत आहेत. दररोज ते ५० युनिट इन्शुलिन घेतात. त्यामुळे सध्या त्यांना इन्शुलिनची गरज आहे, मात्र तिहार तुरुंगात त्यांना ते दिले जात नाहीये.

विशेष म्हणजे आम आदमी पक्षाने केलेल्या आरोपांचे नायब राज्यपालांच्या कार्यालयाने खंडन केले आहे. अटक होण्याच्या काही दिवस आधी केजरीवाल यांनी इन्शुलिन घेणे बंद केले होते. ते मेटमार्फिन नावाच्या मधुमेह नियंत्रणात ठेवणाऱ्या गोळ्या घेत होते, असे नायब राज्यपालांच्या कार्यालयाकडून सांगण्यात आले.

अरविंद केजरीवाल हे सिंहासारखे निडर आहेत. देशातील नागरिकांचे आयुष्य अधिक चांगले कसे करता येईल यासाठी त्यांचा लढा सुरू आहे. ते तुरुंगातही भारत मातेचा विचार करत आहेत

- सुनीता केजरीवाल,अरविंद केजरीवाल यांच्या पत्नी