कोरोना 6 महिन्यांच्या उच्चांकावर; 24 तासांत 81,466 नवे रुग्ण, 469 जणांचा मृत्यू

नवी दिल्ली- देशात कोरोनाने विक्राळ रुप धारण केल्याचे दिसत आहे. सातत्याने कोरोना बाधितांची संख्या वाढत आहे. शुक्रवारी जारी करण्यात आलेल्या आकडेवारीनुसार कोरोना सहा महिन्यांच्या उच्चांकावर आहे. भारतात गेल्या वर्षीसारखी स्थिती बनत आहे. मागील 24 तासांत देशभरात 81 हजार 466 नवीन प्रकरणे समोर आली आहेत. तर दुसरीकडे 469 जणांचा यामुळे मृत्यू झाला आहे. यामुळे देशभरात कोरोनामुळे मृत्यू होणाऱ्यांचा आकडा 1 लाख 63 हजार 396 इतका झाला आहे. संपूर्ण देशभरात कोरोनाने हाहाकार माजवला आहे. 

एकीकडे देशभरात कोरोना लसीकरणाचा तिसरा टप्पा सुरु झाला आहे. लसीकरणाचा वेगही वाढवण्यात आला आहे. मागील 24 तासांत समोर आलेल्या आकडेवारीनुसार देशात 6,14,696 सक्रिय रुग्ण आहेत. तर मागील 24 तासांत 50,356 रुग्ण कोरोनातून बरे झाले आहेत. त्यानंतर देशभरात कोरोनातून बरे होणाऱ्यांची संख्या ही 1,15,25,039 झाली आहे. 

हेही वाचा- सचिन वाझेसोबत 5-स्टार हॉटेलमध्ये असणाऱ्या महिलेची NIAकडून चौकशी

केंद्रीय आरोग्य आणि कुटुंब कल्याण मंत्रालयाने गुरुवारी सांगितले की, देशातील आठ राज्यात दररोज कोरोना रुग्णांच्या संख्येत वाढ नोंदवण्यात येत आहे. मागील 24 तासांत नोंदवण्यात आलेल्या 84.61 टक्के रुग्णांसाठी देशातील 8 राज्यांना जबाबदार ठरवण्यात आले आहे. यात महाराष्ट्र, छत्तीसगड, कर्नाटक, पंजाब, केरळ, तमिळनाडू, गुजरात आणि मध्यप्रदेशचा समावेश आहे. 

हेही वाचा- Corona Update: राज्यातील परिस्थिती चिंताजनक; कोरोना रुग्णसंख्या वाढली

दरम्यान, मागील 24 तासांत विक्रमी 36,71,242 जणांना कोरोना प्रतिबंधक लस देण्यात आली आहे. यापूर्वी 22 मार्चला सर्वाधिक 34.28 लाख जणांना कोरोनाची लस देण्यात आली होती. त्यानंतर 6,87,89,138 जणांना कोरोनाची लस देण्यात आली आहे.