दिलासादायक! दुसरी लाट ओसरतेय, 24 तासात 1.86 लाख नवे रुग्ण

नवी दिल्ली - देशातील कोरोनाची दुसरी लाट ओसरताना दिसत आहे. गुरुवारी दिवसभरात 1 लाख 86 हजार 364 नवीन रुग्ण आढळले. गेल्या 44 दिवसातील ही सर्वात कमी संख्या असल्याची माहिती केंद्रीय आरोग्य मंत्रालयाने दिली आहे. सध्या देशात सक्रीय रुग्णांची संख्या 23 लाख 43 हजार 152 इतकी आहे. तर गेल्या 24 तासात सक्रीय रुग्णांच्या संख्येत 76 हजार 755 ने घट झाली.

गेल्या 24 तासात देशात 1 लाख 86 हजार नवीन रुग्ण सापडले तर 3 हजार 660 जणांचा कोरोनामुळे मृत्यू झाला. आतापर्यंत देशात एकूण 2 कोटी 75 लाख 55 हजार 457 जणांना कोरोनाची लागण झाली आहे. त्यापैकी 2 कोटी 48 लाख 93 हजार 410 जणांनी कोरोनावर मात केली आहे.

गुरुवारी एका दिवसात 2 लाख 59 हजार 459 रुग्ण कोरोनामुक्त होऊन घरी परतले. आतापर्यंत देशात 2 कोटी 48 लाख 93 हजार 410 जण कोरोनामुक्त झाले आहेत. कोरोनामुक्त होण्याचे प्रमाण हे 90.34 टक्क्यांवर पोहोचले आहेत

आठवड्याभरात पॉझिटिव्हीटी रेट 10 टक्के इतका असून एका दिवसाचा पॉझिटिव्हिटी रेट हा 9 टक्के इतका आहे. सलग चौथ्या दिवशी हे प्रमाण दहा टक्क्यांपेक्षा कमी आहे. देशात कोरोनाला रोखण्यासाठी लसीकरण मोहिम सुरु असून आतापर्यंत 20 कोटी 57 लाख डोस देण्यात आल्याची माहितीही आरोग्यमंत्रालयाने दिली.