देशात पहिल्या टप्प्यात 3 कोटी कोरोना योद्धांना देणार लस, सरकारची तयारी

नवी दिल्ली-  भारतात कोरोनाचा कहर कमी होताना दिसत आहे. याचदरम्यान सरकारही कोरोनाच्या लशीकरणाबाबत तयारीला लागले आहे. देशात कोरोनाची लस आल्यानंतर सर्वात आधी ती कोणाकोणाला द्यायची याची सरकारने तयारी केल्याचे आरोग्य मंत्रालयाच्या अधिकाऱ्यांनी सांगितले आहे. पहिल्या टप्प्यात देशात सर्वात आधी लस मिळवणारे 3 कोटी कोण असतील याची ब्ल्यू प्रिंट सरकारने तयार केली आहे. अधिकाऱ्यांच्या मते लस उपलब्ध झाल्यानंतर सर्वप्रथम कोरोना योद्ध्यांना म्हणजे डॉक्टर्स, आरोग्य कर्मचारी, पोलिस आणि सफाई कर्मचाऱ्यांना दिली जाणार आहे. 

केंद्रीय आरोग्य सचिव राजेश भूषण यांनी सांगितले की, कोरोना लस मिळवणाऱ्या 30 मिलियनमध्ये (3 कोटी) 7 मिलियन डॉक्टर्स आणि पॅरामेडिकल स्टाफ आणि 20 मिलियन इतर कोरोना योद्ध्यांना लस दिली जाईल. देशात 3 कोटी लोकसंख्येला लस देण्याबाबत सरकारची योजना तयार आहे. आपल्याकडे शीतगृह, सिरिंज सर्वकाही तयार आहे, असेही ते म्हणाले. 

हेही वाचा- ...म्हणून ग्रामस्थांनी मंत्र्यांवर फेकले शेण

दरम्यान, देशात सध्या कोरोना लस उपलब्ध नाही. पुढील वर्षीच्या सुरुवातीला लस मिळू शकेल, असा अंदाज आहे. त्यामुळे जानेवारी आणि जून 2021 दरम्यान लशीकरणाचा तात्पुरता पहिला टप्पा निश्चित करण्यात आला आहे. 

हेही वाचा- coronavirus: अर्धी लोकसंख्या फेब्रुवारीपर्यंत बाधित; सरकारी समितीचा अंदाज

काही खासगी रुग्णालयांनी त्यांच्याकडे कोविड-19 लशीचा मोठ्याप्रमाणात साठा करणे आणि देखरेखीसाठी पायाभूत सुविधा असल्याचा दावा केला आहे. यावर आरोग्य सचिवांनी याबाबत सरकार खासगी संस्थांशी समन्वय साधत असल्याचे सांगितले.