नवी अँटिबॉडी थेरपी, 12 तासात कोरोना रुग्ण झाले ठणठणीत

नवी दिल्ली - दिल्लीती सर गंगाराम रुग्णालयात दोन कोरोना रुग्णांवर नव्या अँटिबॉडी थेरपीचा प्रयोग करण्यात आला. यामध्ये दोन्ही रुग्ण ठणठणीत बरे होऊन 12 तासाच्या आत घरी परतले. कोरोनाची लक्षणे दिसू लागल्यानंतर सात दिवसांच्या आत गंभीर झालेल्या रुग्णांना ही नवी अँटिबॉडी थेरपी देण्यात आली. रुग्णालयाकडून याबाबतची माहिती देण्यात आली. यात सांगण्यात आलं की, पहिला रुग्ण 36 वर्षाचा आरोग्य कर्मचारी होता. त्याला खूप ताप होता. तसंच खोकला, अशक्तपणा आणि ल्युकोपीनियासुद्धा होता. रुग्ण बरा होण्याच्या सहाव्या दिवशी REGCov2 (CASIRIVIMAB आणि IMDEVIMAB चे मिश्रण) देण्यात आले. काही तासातच रुग्णाच्या प्रकृतीत सुधारणा झाली आणि त्यांना डिस्चार्जही देण्यात आला.

आणखी एक रुग्ण आरके राजदान यांचं वय 80 वर्षे इतकं होतं. त्यांना मधुमेह, हायपरटेन्शनचा त्रास आहे. तसंच ताप आणि खोकलाही होता. त्यांचे ऑक्सिजन सॅच्युरेशन हे रुममधील हवेपेक्षा 95 टक्के जास्त होतं. मोनक्लोनल अँटिबॉडी आणि सीटी स्कॅनमध्ये त्यांच्यात सौम्य लक्षणं दिसून आली होती. त्यानाही पाचव्या दिवशी REGCov2 देण्यात आलं. त्यानंतर 12 तासात प्रकृतीत वेगाने सुधारणा झाली आणि त्यांना घरीही सोडण्यात आलं.

सर गंगाराम रुग्णालयातील डिपार्टमेंट ऑफ मेडिसिनच्या वरिष्ठ कन्सल्टंट डॉक्टर पूजा खोसला यांनी सांगितलं की, जर मोनोक्लोनल अँटिबॉडी योग्य वेळी दिल्यास त्याचा चांगला परिणाम दिसू शकतो. यामुळे जास्त धोका असलेल्यांमध्ये इतर रुग्णांना दाखल करण्याची वेळ येणार नाही. तसंच कोरोनाचा धोका वाढण्यापासून रोखता येईल. गंभीर रुग्णांना देण्यात येणारी औषधे,ज्यामध्ये स्टेरॉइडसह इतर उपचार करावे लागणार नाहीत. यामुळे म्युकरमायकोसिससारखे आजार आणि व्हायरल इन्फेक्शनचा धोकाही टळेल.