नवी दिल्ली, ता. ४ : हवामान, रोजगारांची उपलब्धता, स्वच्छता, आरोग्य सुविधा, नगरपालिकांचे कामकाज आदी बाबींमध्ये समाधानकारक दर्जा राखणाऱ्या देशातील राहण्यायोग्य शहरांच्या- २०२० च्या यादीत (इज ऑफ लिव्हिंग) माहिती-तंत्रज्ञानाची राजधानी बंगळूरने अव्वल क्रमांक पटकावला आहे. राज्यातील पुणे, नवी मुंबई, ठाणे व बृहन् मुंबई ही शहरे देखील राहाण्यासाठी भारी ठरली आहेत. दहा लाखांहून जास्त लोकसंख्या (२) व नगरपालिकांची कामगिरी (५) या दोन्ही गटांत पहिल्या पाचांमध्ये पुण्याचा समावेश झाला आहे. दहा लाखांपेक्षा कमी लोकसंख्येच्या राहण्यायोग्य शहरांत हिमाचल प्रदेशाची राजधानी सिमला अव्वल ठरले आहे. सुसह्य वाहतुकीबाबत ठाणे दुसऱ्या क्रमांकावर आहे. चेन्नई पहिल्या व बंगळूर तिसऱ्या स्थानी आहे.
दिल्ली तेराव्या स्थानी
केंद्रीय नगरविकास मंत्री हरदीपसिंग पुरी यांनी आज एका ऑनलाइन कार्यक्रमात विविध गटांतील राहण्यायोग्य शहरांचे व नगरपालिकांच्या कामगिरीचे २०२० साठीची मानांकने जाहीर केली. वीस शहरांच्या सर्वसाधारण यादीत देशाची राजधानी नवी दिल्ली तेराव्या स्थानी आहे. देशातील १११ शहरांचे सर्वेक्षण करून ही यादी तयार करण्यात आली होती. यातील ४९ शहरे १० लाखांहून जास्त लोकसंख्येची व ६२ शहरे त्यापेक्षा कमी लोकसंख्येची आहेत.
तमिळनाडूत पर्यावरण चांगले
नगरपालिकांच्या चांगल्या कामगिरीबद्दल मध्यप्रदेशातील इंदूर अव्वल स्थानी आहे. या गटातही ११४ शहरांचे सर्वेक्षण झाले होते. त्यात इंदूर, सूरत व भोपाळ यांनी पहिले तीन क्रमांक पटकावले. कमी लोकसंख्येच्या गटात नवी दिल्ली, तिरूपती व गांधीनगर ही तीन शहरे टॉप तीनमध्ये आहेत. पर्यावरण उत्तम असलेल्या दहा राहण्यायोग्य शहरांच्या यादीत एकट्या तमिळनाडूतील सहा शहरांनी स्थान पटकावले आहे. दर्जेदार शिक्षण मिळणाऱ्या शहरांमध्ये तिरुअनंतपुरम, बेळगाव व चंडीगड, तर आरोग्य सुविधांबाबत इंफाळ, वेल्लोर व पोर्ट ब्लेअर ही तीन शहरे अव्वल ठरली आहेत.
सर्वसाधारण यादी
दहा लाखांपेक्षा जास्त लोकसंख्या : बंगळूर, पुणे, अहमदाबाद, चेन्नई, सूरत, नवी मुंबई, कोइमतूर, बडोदा, इंदूर व बृहन् मुंबई.
दहा लाखांपेक्षा कमी लोकसंख्या : सिमला ,भुवनेश्वर, सिल्वासा, काकीनाडा, सालेम, वेल्लूर, गांधीनगर, गुरुग्राम, दावणगिरे व तिरुचिरापल्ली.
नगरपालिकांचे कामकाज
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.