Video : "दिल्ली तळ्यांचं शहर होतंय"; पावसात रस्त्यावर तळे, केजरीवालांच ते वक्तव्य तरूणांनी खरं ठरवलं

"आम्ही दिल्ली शहरामध्ये ३८० तळे बांधणार आहोत, येत्या काळात हळूहळू दिल्ली हे तळ्यांचे शहर बनेल" असं वक्तव्य दिल्लीचे मुख्यमंत्री अरविंद केजरीवा यांनी एका सभेत केलं होतं. त्यानंतर आता दिल्लीमध्ये पावसाने थैमान घातले असून तळेमय झालेल्या भागाचे व्हिडिओ सोशल मीडियावर व्हायरल झाले आहेत.

सध्या तीन तरूणांचा व्हिडिओ सोशल मीडियावर व्हायरल झाला आहे. त्यामध्ये एक मुलगा एका तरंगत्या वस्तूवर बसून पाण्यातून प्रवास करत आहे. तर त्याच्या हाताला धरून दोन तरूण त्याला गाडीवरून ओढत घेऊन चाललेले आहेत. हे चित्र पाहून सर्वजण त्यांच्याकडे आश्चर्यचकित होऊन पाहताना दिसत आहे. तर या व्हिडिओला अरविंद केजरीवाल यांच्या भाषणाचा आवाज लावण्यात आला आहे.

दरम्यान, हा व्हिडिओ सध्या चांगलाच व्हायरल झाला असून अनेकांनी त्यावर आपल्या प्रतिक्रिया व्यक्त केल्या आहेत. इंस्टाग्रामवर शेअर करण्यात आलेल्या या व्हिडिओला आत्तापर्यंत १० लाखांपेक्षा जास्त लोकांनी पसंती दर्शवली असून मजेशीर कमेंट केल्या आहेत. तर "अरविंद केजरीवाल यांना दिल्लीत तळे बांधण्याची गरज नाही. पावसामुळे आयते तळे दिल्लीला मिळाले आहेत" अशा आशयाच्या कमेंट नेटकऱ्यांनी दिल्या आहेत.