माजी पंतप्रधानांच्या पत्नीला मिळाली 'इन्कम टॅक्स'ची नोटीस!

नवी दिल्ली : भारताचे माजी पंतप्रधान एच. डी. दैवेगौडा (HD Deve Gawda) यांची पत्नी चिन्नम्मा दैवेगौडा यांना इन्कम टॅक्स (Income Tax) विभागानं नोटीस पाठवली आहे. शेतजमिनीवर मिळणाऱ्या उत्पन्नाच्या संदर्भात त्यांना ही नोटीस पाठवण्यात आली आहे. त्यांचा मुलगा आणि माजी मंत्री एच. डी. रेवन्ना यांनी ही माहिती दिली. (Former PM Deve Gowda wife gets Income Tax notice)

हसन इथं बोलताना माजी मंत्री रेवन्ना म्हणाले, "इन्कम टॅक्स विभागानं आम्हाला नोटीस पाठवली असून माझ्या आईच्या नावे ही नोटीस आली आहे. आम्ही आमच्या शेतामध्ये ऊसाचं पीक घेतो, हे पाहण्यासाठी इन्कम टॅक्सच्या अधिकाऱ्यांनी इथं येऊन प्रत्यक्ष पहावं. तसेच ड्रोनच्या माध्यमातून या शेतजमिनीचं त्यांनी सर्व्हेक्षण करावं. या जमिनीच्या माध्यमातून माझ्या आई-वडिलांना कोट्यवधींचं उत्पन्न मिळालंय का? आम्ही नवी मालमत्ता खरेदी केली आहे का? एका राजकीय पक्षाला अशा पद्धतीनं टार्गेट का केलं जातंय? असे अनेक सवालही रेवन्ना यांनी उपस्थित केले आहेत.

हसन जिल्ह्यातील दोद्दापुरा आणि पडूवल्लाहिप्पे या दोन ठिकाणच्या दैवेगौडा कुटुंबाच्या मालकीच्या जमिनीसंदर्भात इन्कम टॅक्सनं नोटीस बजावली आहे. या नोटिशीत दैवेगौडा कुटुंबियांच्या मालमत्तांची सखोल माहिती विचारण्यात आली आहे. इन्कम टॅक्सच्या या नोटिशीला आम्ही कायदेशीररित्या उत्तर देणार आहोत, असं रेवन्ना यांनी सांगितलं.

दरम्यान, कर्नाटकचे माजी मुख्यमंत्री आणि रेवन्ना यांचे बंधू एचडी कुमारस्वामी म्हणाले, आमच्या कुटुंबियांकडून या नोटीसीचा वापर राजकीय हत्यार म्हणून केला जाणार नाही. आमच्या कुटुंबाचे व्यवहार पारदर्शी आहेत त्यामुळं इन्कम टॅक्स विभागाच्या नोटिशीमुळं काळजी करण्याचं कारण नाही.