Ghulam Nabi Azad : काँग्रेस सोडल्यानंतर आझादांची जम्मूमध्ये आज पहिलीच जाहीर सभा

Ghulam Nabi Azad News : जम्मू-काश्मीरचे (Jammu and Kashmir) माजी मुख्यमंत्री गुलाम नबी आझाद (Ghulam Nabi Azad) यांनी अलीकडंच काँग्रेससोबतचे (Congress) 5 दशकांचे जुने संबंध तोडले आहेत. गुलाम नबी आझाद आज (रविवार) जम्मूमधून आपल्या नव्या राजकीय प्रवासाला सुरुवात करणार आहेत. त्यामुळं माजी मुख्यमंत्री आझाद यांची आज 4 सप्टेंबर रोजी सैनिक कॉलनीत (Sainik Colony) जाहीर सभा होणार आहे.

जम्मूत होणाऱ्या या सभेची सर्व तयारी पूर्ण झालीय. सार्वजनिक सभेच्या ठिकाणी 20,000 हून अधिक लोकांसाठी बसण्याची व्यवस्था करण्यात आलीय. खरं तर आज होणारी ही रॅली अत्यंत महत्त्वाची मानली जात आहे. कारण, आझाद आज आपल्या नव्या पक्षाची घोषणा करू शकतात. माजी मंत्री जीएम सरुरी (GM Saruri) यांनी सांगितलं की, 'आझाद यांचं आज सकाळी दिल्लीहून आगमन झाल्यावर त्यांचं भव्य स्वागत केलं जाईल. त्यानंतर सार्वजनिक सभेच्या ठिकाणी त्यांची मिरवणूक काढण्यात येईल.' आझाद यांच्या समर्थनार्थ काँग्रेसमधून राजीनामा देणाऱ्या दोन डझनहून अधिक आमदारांमध्ये सरुरी यांचाही समावेश आहे.

गुलाम नबी आझाद यांनी 26 ऑगस्टला काँग्रेस पक्षाच्या प्राथमिक सदस्यत्वाचा राजीनामा दिला. राजीनामा देण्यासोबतच आझाद यांनी काँग्रेस नेते राहुल गांधी (Rahul Gandhi) यांच्यावरही जोरदार हल्लाबोल केला. आझाद यांच्या राजीनाम्यानंतर माजी उपमुख्यमंत्री, 8 माजी मंत्री, एक माजी खासदार, 9 आमदार, पंचायतराज संस्थानचे सदस्य, जम्मू-काश्मीरमधील नगरपरिषद आणि तळागाळातील अनेक कार्यकर्त्यांनी काँग्रेसचा राजीनामा दिला होता.