Future Retail : रिटेल किंग किशोर बियाणी यांचा चेअरमनपदाचा राजीनामा; कारण...

नवी दिल्ली - उद्योगपती किशोर बियाणी यांनी फ्यूचर रिटेल लिमिटेडच्या (एफआरएल) निलंबित संचालक मंडळाच्या अध्यक्षपदाचा राजीनामा दिला आहे. ही कंपनी सध्या दिवाळखोरीच्या कारवाईचा सामना करत आहे. फ्युचर रिटेलने शेअऱ मार्केटला दिलेल्या निवेदनात म्हटलं की, कंपनीचे कार्यकारी संचालक आणि निर्देशक बियानी यांनी पदाचा राजीनामा दिला आहे.

कंपनीच्या सोल्यूशन प्रोफेशनलला २४ जानेवारी २०२३ रोजी ईमेलद्वारे ही माहिती मिळाली. बँक ऑफ इंडियाचे कर्ज थकवल्याबद्दल एफआरएलला दिवाळखोरीच्या कारवाईला सामोरे जावे लागले. २००७ पासून फ्युचर रिटेल लिमिटेडशी संलग्न असलेले किशोर बियानी यांनी म्हटलं की, दुर्दैवी व्यावसायिक परिस्थितीमुळे कंपनीला सीआयआरपीला (कॉर्पोरेट दिवाळखोरी निवारण प्रक्रियेला) सामोरे जावे लागत आहे. कंपनीशी माझे भावनिक संबंध आहेत. मी कंपनीच्या वाढीसाठी सर्वकाही केले, पण मला वास्तव स्वीकारावे लागेल आणि पुढे जावे लागेल.

६१ वर्षीय किशोर बियाणी यांनीही कर्जदारांना सहकार्याचे आश्वासन दिले आहे. राजीनामा दिला असला तरी माझ्या मर्यादित संसाधनांच्या बळावर आणि कंपनीशी संबंधित कोणत्याही समस्यांचे निराकरण करण्याच्या क्षमतेच्या जोरावर मी सर्वतोपरी मदतीसाठी उपलब्ध राहीन, असे ते म्हणाले.

किशोर बियानी हे भारतातील रिटेल किंग म्हणूनही ओळखले जात होते. भारतातील आधुनिक किरकोळ क्षेत्राचे प्रणेते म्हणून त्यांची ओळख आहे.