अखिलेश यादव यांच्या घराबाहेर पोलिसांची गाडी आंदोलकांनी पेटवली

लखनऊ: उत्तर प्रदेशचे (uttar pradesh) माजी मुख्यमंत्री अखिलेश यादव (Akhilesh Yadav) यांच्या निवासस्थानाबाहेर उभी असलेली पोलिसांची जीप (police jeep) आंदोलकांनी सोमवारी पेटवून दिली. अखिलेश यादव त्यांच्या निवासस्थानापासून काही मीटर अंतरावर धरणे आंदोलनाला बसलेले असताना ही घटना घडली. पोलिसांनी अखिलेश यांना लखीमपूर खीरी (Lakhimpur Kheri violence) येथे जाण्यापासून रोखलं. त्यामुळे त्यांनी रस्त्यातच धरणे आंदोलन सुरु केलं.

"पोलीस कर्मचारी आग विझवताना व्हिडीओमध्ये दिसत आहे. कोणी केलं, माहित नाही. आम्ही आतमध्ये गेलो होतो. त्या दरम्यान कोणीतरी हे कृत्य केलं" असे पोलिसांनी सांगितले .लखीमपूर खीरी येथे शेतकऱ्यांच्या आंदोलनादरम्यान हिंसाचार उफाळला. यामध्ये एकूण आठ जणांचा मृत्यू झाला. यात चार शेतकरी आहेत. त्तर प्रदेशाचे उपमुख्यमंत्री केशवप्रसाद मौर्य हे तिकोना-भवानीपूर येथे रविवारी दौऱ्यावर आले होते. यावेळी शेतकऱ्यांनी काळे झेंडे दाखविले. त्यानंतर ही घटना घडली.

स्थानिक माध्यमांनी दिलेल्या माहितीनुसार केंद्रीय गृहराज्यमंत्री अजय मिश्रा आणि उपमुख्यमंत्री केशवप्रसाद मौर्य हे एका कार्यक्रमासाठी लखीमपूर खेरी येथे आले होते. त्यानंतर ते मिश्रा यांचे मूळ गाव भवानीपूर येथे जाणार होते. त्यांच्या कार्यक्रमाची माहिती मिळताच कृषी कायद्यांच्या विरुद्ध आंदोलन करणारे शेतकरी ते उतरणार असलेल्या हेलिपॅडपाशी सकाळी आठ वाजताच पोहोचले.

त्यांनी हेलिपॅडवर ठिय्या दिला व त्याचा ताबा घेतला. त्यानंतर दुपारी पावणेतीन वाजता मोटारीने मिश्रा आणि मौर्य यांचा ताफा तिकोनिया चौकातून गेला, तेव्हा त्यांना काळे झेंडे दाखविण्यासाठी शेतकरी धावले. त्याचवेळी ताफ्यातील दोन मोटारी त्या गर्दीत घुसल्या. त्यामुळे अनेक शेतकरी चिरडले गेले. हे पाहताच शेतकरी संतप्त झाले. त्यांनी त्या दोन्ही गाड्यांना आग लावली. या घटनेत चार शेतकरी मृत्युमुखी पडल्याचे सांगितले जाते. तर चार भाजप कार्यकर्त्यांचा मृत्यू झालाय.