MBBS Student : 'माफ करा.. मी डॉक्टर होऊ शकले नाही'; 9 व्या मजल्यावरून उडी मारुन मेडिकल विद्यार्थिनीची आत्महत्या

लखनौच्या सरोजिनी नगर (Lucknow Sarojini Nagar) येथील टीएस मिश्रा मेडिकल कॉलेजमध्ये (TS Mishra Medical College) एमबीबीएस (MBBS) प्रथम वर्षात शिकणाऱ्या मृणाल सिंग (Mrinal Singh) या 23 वर्षीय विद्यार्थिनीनं वसतिगृहाच्या नवव्या मजल्यावरून उडी मारून आत्महत्या केलीये.

ही घटना काल उशिरा घडलीये. मृत मृणाल सिंग ही पीरबाहोर पोलीस स्टेशन अंतर्गत अशोक राजपथ इथं असलेल्या एका खासगी कोचिंग संस्थेचे शिक्षक कौशल किशोर सिंग यांची मुलगी आहे. कॉलेज कॅम्पसमध्येच बांधलेल्या हॉस्टेलमध्ये ती राहत होती.

महाविद्यालयातील इतर विद्यार्थिनींनी दिलेल्या माहितीनुसार, मृणाल 902 क्रमांकाच्या खोलीत राहायची. साक्षी नावाची विद्यार्थिनीही तिच्यासोबत राहत होती. लखनौ पोलिसांनी सांगितलं की, मृणालच्या खोलीतून एक सुसाईड नोटही सापडलीय. यामध्ये तिनं लिहिलंय, सॉरी... मी डॉक्टर होऊ शकले नाही. शिवाय, तिनं एमबीबीएस पूर्ण करू न शकल्यामुळं दु:खही व्यक्त केलंय. दरम्यान, फॉरेन्सिक टीमनं तपास पूर्ण केला असून पुरावे गोळा केले जात आहेत.