भीषण अपघातात मर्सिडीजचा चुराडा; 2 ठार, 3 गंभीर जखमी

भरधाव वेगातील मर्सिडीज कारने ट्रकला पाठीमागून धडक दिल्याने झालेल्या भीषण अपघातात कारमधील 2 जण ठार तर 3 जण गंभीर जखमी झाले आहेत. दिल्लीतील (Delhi) कँट परिसरातील एका उड्डाणपुलावर हा अपघात (Accident) झाला. यामध्ये कारमधील दोन तरुणांचा मृत्यू झाला, तर तिघांची प्रकृती चिंताजनक असून त्यांना रुग्णालयात दाखल करण्यात आले आहे. मिळालेल्या माहितीनुसार, पाच तरुण मर्सिडीज (Mercedes) कारमधून प्रवास करत होते. फरिदाबादमध्ये एका लग्नात सहभागी होऊन परतत असताना 18 आणि 19 फेब्रुवारीच्या मध्यरात्री 3.00 च्या सुमारास हा भीषण अपघात झाला. धौला कुआंहून पालमला जात असताना हा अपघात झाला. या अपघातात मर्सिडीज कारचे मोठे नुकसान झाले आहे. (Mercedes car accident with truck on Delhi's flyover, 2 killed, 3 in critical condition)

दिल्ली पोलिसांनी (Delhi Police) दिलेल्या माहितीनुसार, पहाटे 2:50 वाजता उड्डाणपुलावर भरधाव वेगाने येत असलेली एक मर्सिडीज कार ट्रकला धडकली, अशी माहिती मिळाली. पोलिस पथक घटनास्थळी पोहोचले तेव्हा मर्सिडीज कार उलटलेल्या अवस्थेत आढळून आली. पोलिसांनी तातडीने मर्सिडीजमधील पाचही तरुणांना बाहेर काढले आणि जवळच्या रुग्णालयात पाठवले. त्यापैकी विनोद आणि कृष्णा सोळंकी या दोघांना हॉस्पिटलमध्ये मृत घोषित करण्यात आले.

या अपघातावेळी पाच जण मर्सिडीजमधून प्रवास करत होते. त्यापैकी विनोद आणि कृष्णा सोळंकी या दोघांचा उपचारादरम्यान मृत्यू झाला. तर नितीन, जितेंद्र आणि करण भारद्वाज गंभीर असून त्यांच्यावर अतिदक्षता विभागात उपचार सुरु आहेत. याप्रकरणी पोलिसांनी एफआयआर नोंदवला आहे. सीसीटीव्हीच्या मदतीने ट्रकचालकाचा शोध घेण्यात येत आहे.