PM Modi in Pune : मोदींचा पुणे दौरा केवढ्याला पडणार? पंतप्रधानांच्या सुरक्षेसाठी एका दिवसाला किती येतो खर्च?

पंतप्रधान नरेंद्र मोदी आज पुणे दौऱ्यावर आहेत. यामुळे शहरात मोठा पोलीस बंदोबस्त करण्यात आला आहे. पंतप्रधानांच्या सुरक्षेसाठी दररोज मोठ्या प्रमाणात खर्च केला जातो. जेव्हा पंतप्रधान एखाद्या राज्याच्या दौऱ्यावर जातात, तेव्हा त्यांच्या सुरक्षेसाठी एसपीजी, एएसएल या सुरक्षा यंत्रणा आणि राज्य व स्थानिक पोलीस प्रशासन तैनात केलं जातं.

असा असतो ताफा

पंतप्रधान नरेंद्र मोदी हे स्वतः एका बुलेटप्रूफ कारमध्ये असतात. त्यांच्या सुरक्षा ताफ्यामध्ये सुमारे 19 गाड्या असतात. यात दोन आर्मर्ड गाड्या, नऊ हायप्रोफाईल गाड्या, रुग्णवाहिका आणि डमी कार्स यांचा समावेश असतो. त्यांच्यासोबत सुमारे 100 जवान असतात.

जॅमर कार

यासोबतच, पंतप्रधानांच्या ताफ्यामध्ये एक जॅमर असणारी गाडीही असते. या गाडीमुळे रस्त्याच्या दोन्ही बाजूला असणारे रेडिओ किंवा रिमोट कंट्रोल डिव्हाईस जॅम होऊन जातात. रिमोटच्या माध्यमातून होणारे IED बॉम्ब हल्ले रोखण्यासाठी ही गाडी फायद्याची ठरते. (Pune News)

मोदींसोबत आलेल्या राज्यपाल, मुख्यमंत्री, उपमुख्यमंत्री, पालकमंत्री, प्रमुख नेते, अग्निशामक वाहन आणि शासकीय अधिकाऱ्यांची वाहने असं सगळं मिळून हा ताफा सुमारे 30 ते 35 वाहनांचा होतो. (PM Modi Security)

किती होतो खर्च?

पंतप्रधान मोदींनी एसपीजी सुरक्षा दिली जाते. यापूर्वी सोनिया गांधी, राहुल गांधी आणि प्रियंका गांधी यांनाही एसपीजी सुरक्षा देण्यात येत होती. मात्र, आता केवळ पंतप्रधान मोदींनाच ही सुरक्षा दिली जाते. 2020-21 साली एसपीजीचं वार्षिक बजेट हे 429.05 कोटी रुपये होतं. 2022-23 मध्ये एसपीजीचं बजेट कमी करून, 385.95 कोटी करण्यात आलं आहे. म्हणजेच, पीएम मोदींच्या सुरक्षेसाठी एका दिवसाला 1.17 कोटी रुपये खर्च होतात.