'मोदींनीच तोडली सर्वांत जास्त मंदिरं'

वाराणसी : प्रसिद्ध पत्रकार आतिश तासिर यांनी पंतप्रधान नरेंद्र मोदींवर एक मोठा आरोप करत ट्विट केले आहे. गझनीनंततर सर्वात जास्त मंदिरं तोडणारे मोदी आहेत, असे एका महंताने म्हणले आहे, असा थेट आरोप तासिर यांनी केला आहे. 

एका महंतांचा संदर्भ देत पंतप्रधान नरेंद्र मोदींवरमंदिर तोडण्याचा आरोप तासिर यांनी केला आहे. तासिर यांनी वाराणसीच्या प्रसिद्ध काशी विश्वनाथ मंदिराचे फोटो शेअर करत ट्विट केले आहे. त्यामध्ये, औरंगजेबाला तर विसराच, काशी विश्वनाथ मंदिरातील एका महंतांनी असं म्हटलंय, असे लिहिलं आहे. तसेच, गझनीनंतर इतर कुठल्याही व्यक्तीने एवढी मंदिरं तोडली नसतील जेवढी, मोदींनी तोडली आहेत, असे म्हटले आहे.  

तासिर यांनी आपल्या ट्विटमध्ये लिहिले आहे की, ते महंत वाराणसी येथे सरकारद्वारे बनविण्यात येत असलेल्या कॉरिडोअरसंदर्भात बोलत आहेत. केवळ एक स्मारक बनविण्यासाठी शहराचा आत्मा असलेल्या भागाला नष्ट करण्यात येत आहे, असे महंतांचे म्हणणे असल्याचेही तासिर यांनी आपल्या ट्विटमध्ये म्हटले आहे. वाराणसीतील प्रसिद्ध काशी विश्वनाथ मंदिराच्या कॉरिडोर बांधणीचे काम युद्धपातळीवर सुरू आहे. कॉरिडोअर बनविण्यासाठी या परिसरातील घरे आणि लहान-मोठी मंदिरे काढण्यात आली आहेत. गंगा नदीकाठच्या ललिता घाट आणि मणकर्णिका घाट येथून ते काशी विश्वनाथ मंदिरपर्यंत हा कॉरिडोअर बनविण्यात येत आहे. या निर्माण प्रक्रियेत ज्या लोकांची घरे पडली आहेत, ते या कॉरिडोअरला आपला विरोध दर्शवत आहेत. तसेच, मंदिर काढण्यात येत असल्याने अनेक महंत आणि पुजारीही नाराज असल्याचं समजते. मात्र, सरकारकडून केवळ अतिक्रमण हटविण्यात येत असल्याचं सागिंतलं जात आहे.