Russia Ukraine War l काँग्रेसच्या निशाण्यावर केंद्र सरकार; म्हणाले...

दिल्ली: युक्रेनच्या (Russia Ukraine War) मुद्द्यावरुन काल (ता.३) परराष्ट्र मंत्रालयाच्या बैठकीनंतर काँग्रेस (Congress) खासदार शशी थरूर (Shashi Tharoor) यांनी भारताच्या परराष्ट्र धोरणाचे कौतुक केले होते. त्याचबरोबर त्यांनी परराष्ट्र मंत्री आणि त्यांच्या सहकाऱ्यांचे तपशीलवार ब्रीफिंग केले आणि सर्व प्रश्नांची उत्तरे दिल्याबद्दल त्यांचे आभार मानले. दरम्यान आज पुन्हा काँग्रेसनेच युक्रेनमध्ये अडकलेल्या विद्यार्थ्यांच्या मायदेशी परतण्याबाबत केंद्र सरकारवर निशाणा साधला आहे. खार्किव आणि सुमीमध्ये (Kharkiv, Sumi) अडकलेल्या विद्यार्थ्यांना मायदेशी परतण्यास इतका का वेळ लागत आहे असा प्रश्न यावेळी उपस्थित करण्यात आला.

काँग्रेसच्या प्रवक्त्या शमा मोहम्मद (Shama Mohamed) म्हणाल्या, युक्रेनमधून विद्यार्थ्यांना माघार घेतल्याने सरकारचे क्रूर हृदय समोर आले आहे. युक्रेनच्या सीमेवर पश्चिमी देशाच्या बॉर्डरवर गेलेल्या मंत्र्यांच्या भूमिकेवरही काँग्रेसने शंका घेतली आहे. जे चार ४ मंत्री गेले आहेत ते फक्त गुलाब देण्यासाठी गेले आहेत का असा प्रश्न उपस्थित केला आहे.

युक्रेनमधून भारतीय विद्यार्थ्यांना कधी परत आणणार

सरकारवर निशाणा साधत काँग्रेसने म्हटले की, स्थलांतर युद्धक्षेत्रात होते, मंत्री शांतता क्षेत्रात आणि विद्यार्थी युद्धक्षेत्रात हे असे कसे असू शकते. म्हणजे मंत्री नेमके गेले कोठे. युक्रेनमध्ये अजूनही किती विद्यार्थी अडकले आहेत आणि किती अधिकारी तेथे तैनात आहेत याचे उत्तर सरकारने द्यावे. तसेच विद्यार्थ्यांना कधीपर्यंत परत आणले जाणार आहे याची माहितीही सरकारने द्यावी अशी मागणी काँग्रेसने केली आहे.

काँग्रेसच्या प्रवक्त्या शमा मोहम्मद यांनी सुमीमध्ये अडकलेल्या भारतीय विद्यार्थ्याचा व्हिडिओ शेअर केला आहे. या व्हिडिओमध्ये विद्यार्थ्यांनी सुमीमध्ये विद्यार्थी किती असहाय्य आणि दु:खी आहेत हे सांगितले आहे.तसेच पंतप्रधान मोदी यांनी सुमीमधून लवकरात लवकर बाहेर काढण्याची मागणी केली आहे.