अखिलेश यादव पहिल्यांदाच विधानसभेच्या मैदानात; पाहा कुठून लढणार?

लखनऊ : समाजवादी पार्टीचे प्रमुख अखिलेश यादव (Akhilesh Yadav) हे पहिल्यांदाच उत्तर प्रदेश विधानसभा निवडणूक (Uttar Pradesh Election) लढवणार आहेत. गुरुवारी त्यांनी आपल्या मतदारसंघाची घोषणाही केली. मैनिपुरी जिल्ह्यातील कऱ्हाल विधानसभा मतदारसंघातून ते निवडणूक लढवणार आहेत. कऱ्हाल (Karhal) इथं २० फेब्रुवारी रोजी मतदान होणार आहे. (Samajwadi Party chief Akhilesh Yadav to contest UP polls from Karhal constituency)

सध्या अखिलेश यादव हे लोकसभेचे खासदार आहेत. आझमगडमधून मतदारसंघातून ते निवडून आले आहेत. त्यांनी यापूर्वी कधीही विधानसभा निवडणूक लढवलेली नाही. जेव्हा ते सन २०१२ मध्ये उत्तर प्रदेशचे मुख्यमंत्री बनले होते तेव्हा त्यांनी विधानपरिषदेतून विधीमंडळाचं सदस्यत्व मिळवलं होतं.

समाजवादी पार्टीचे प्रमुख अखिलेश यादव हे मैनिपूर सदर, कनौजमधील चिब्रामाऊ, आझमगडमधील गोपालपूर किंवा संभालमधील गुन्नूर येथून निवडणूक लढवतील अशी चर्चा सुरु होती. पण अखेर ते कऱ्हाल मतदारसंघातून निवडणूक लढवणार आहेत.

सध्या शोभन सिंह यादव हे कऱ्हाल येथून समाजवादी पार्टीचे आमदार आहेत. १९९३ पासून सात वेळा समाजवादीपार्टीनं ही जागा जिंकली आहे. पण २००२ मध्ये भाजपनं ही जागा आपल्या खिशात घातली होती.