Sharad Pawar: NCP अध्यक्षपदाचा राजीनामा दिल्यानंतर शरद पवारांच लक्ष दिल्लीत; ट्विट करत म्हणाले...

NCP News: राष्ट्रवादीचे अध्यक्ष शरद पवार यांनी दोन दिवसापूर्वी आपल्या अध्यक्ष पदाचा राजीनामा देणार असल्याचं सांगितलं. त्यानंतर राज्याच्या राजकारणात मोठी खळबळ उडाली. त्यानंतर पवार यांनी आपला निर्णय मागे घ्यावा असा आग्रह राष्ट्रवादीच्या सर्व नेतेमंडळींकडून तसेच कार्यकर्त्याकडून केला जात आहे.

यावर शरद पवार विचार करून निर्णय कळवतील असं म्हणाले आहेत. या सर्व घडामोडी राज्यात सुरू असतानाच शरद पवार देशातील विविध गोष्टींवर आपली भूमिका रोखठोकपणे मांडताना दिसून येत आहेत. आजही शरद पवार यांनी देशातील एका घटनेसंदर्भात केंद्रीय मंत्री अमित शाह यांना टॅग करत ट्विट केलं आहे.

शरद पवार यांनी या ट्वीटच्या माध्यमातून देशातील एका महत्त्वपूर्ण घटनेवर भाष्य केलं आहे. याबाबत थेट केंद्रीय गृहमंत्री अमित शाह यांना ट्वीटमध्ये टॅग करत आपलं मत स्पष्टपणे मांडलं आहे.

भारतीय कुस्ती महासंघाचे अध्यक्ष आणि खासदार ब्रिजभूषण शरण सिंह यांच्याविरोधात महिला कुस्तीपटूंचे काही दिवसांपासुन आंदोलन सुरू केलं आहे. आंदोलनाला विविध राजकीय पक्ष, खेळाडूंनी पाठिंबा दिला आहे.

आंदोलक महिला कुस्तीपटूंच्या समर्थनार्थ दिल्ली विद्यापीठातील विद्यार्थ्यांनी मोर्चा काढला. पण त्या मोर्चातील विद्यार्थींना पोलिसांनी ताब्यात घेतलं. या प्रकारावरून मोठा गोंधळ निर्माण झाला होता यासंबधी शरद पवार यांनी ट्वीट केलं आहे.

"दिल्लीत बृजभूषण सिंह यांच्या विरोधात महिला कुस्तीपटूंनी आंदोलन पुकारलं आहे, त्याच्या समर्थनार्थ दिल्लीतील कॉलेजच्या विद्यार्थींनींनी एक रॅली काढली होती. त्या रॅलीमधील विद्यार्थींनींशी पोलिसांनी केलेले वर्तन हे अतिशय चुकीचे, खूपच वेदनादायी आणि वाईट आहेत.

शांतपणे आंदोलन करणाऱ्या आंदोलकांवर पोलिसांनी केलेल्या अत्याचाराचा जाहीर निषेध करतो. मी वैयक्तिकरित्या गृहमंत्र्यांना आवाहन करतो की, आता त्यांनीच या प्रकरणात लक्ष घालावं" असं ट्विट शरद पवार यांनी केलं आहे.

काल (बुधवारी) मध्यरात्री दिल्ली पोलीस आणि कुस्तीपटूंमध्ये हाणामारी झाल्याचे वृत्त समोर येत आहे. त्यात महिला कुस्तीपटूंना शिविगाळ केल्याचा आरोपही या खेळाडूंनी केला आहे.