Ramdev baba : रामदेवबाबांची माफी सुप्रीम कोर्टाने फेटाळली; दिशाभूल करणाऱ्या जाहिरातींवरुन तीनदा बजावलं तरीही...

Baba Ramdev in Supreme Court : बाबा रामदेव आणि आचार्य बाळकृष्ण यांच्या अडचणी कमी होताना दिसत नाहीत. पतंजली आयुर्वेदच्या दिशाभूल करणाऱ्या जाहिरातींवरुन सुप्रीम कोर्टाने बुधवारी पुन्हा सुनावणी घेतली. कोर्टाने पुन्हा बाबा रामदेव आणि आचार्य बाळकृष्ण यांना फटकारलं.

कोर्टाने रामदेव बाबांनी मागितलेली माफी फेटाळून लावत प्रतिज्ञापत्रात धोकेबाजी करत असल्याचा ठपका ठेवला. कोर्टाने बिनशर्त माफीच्या रामदेव बाबांच्या शपथपत्राला स्वीकार करण्यास नकार दिला. न्यायमूर्ती अमानुल्लाह आणि न्यायमूर्ती हिमा कोहली यांच्या बेंचने या प्रकरणाची सुनावणी घेतली.

यावेळी कोर्टाने म्हटलं की, तीन-तीन वेळेस आमच्या आदेशाकडे दुर्लक्ष केल्यामुळे याचे परिणाम भोगावे लागतील, आम्ही आंधळे नाहीत. केंद्र सरकारने या प्रकरणात दाखल केलेल्या उत्तरावरही कोर्टाने नाराजी व्यक्त केली.

दरम्यान, बुधावरी झालेल्या सुनावणीच्या पूर्वी मंगळवारी रामदेव आणि आचार्य बाळकृष्ण यांनी कोर्टासमोर बिनशर्त माफी मागितली होती. त्यापूर्वीच्या सुनावणीमध्ये कोर्टाने दोघांना फटकारलं होतं. स्वतःला कायद्यापेक्षा मोठं समजू नये, असा सल्ला कोर्टाने रामदेव बाबांना दिला होता.

२ एप्रिलला कोर्टात काय झालं?

• पतंजली आयुर्वेदच्या वकिलांनी पुढे म्हटलं की, स्वतः रामदेव बाबा कोर्टात हजर असून ते माफी मागत आहेत. कोर्टाने त्यांच्या माफीची नोंद घ्यावी. आम्ही कोर्टापासून पळ काढण्याचा प्रयत्न करत नाहीत.

• वकिलांनी पुढे म्हटलं, या प्रकरणासंदर्भात मी काही मजकूर वाचू शकतो का? दिशाभूल करणाऱ्या जाहिरातींबद्दल सुप्रीम कोर्टाने दिलेल्या आदेशाची आमच्या मीडिया प्रमुखांना माहिती नव्हती. त्यामुळे अशी जाहिरात चालली.

दरम्यान, सुप्रीम कोर्टाने २०२३ मध्ये पतंजली या कंपनीला आदेश दिला होता की, त्यांनी दिशाभूल करणाऱ्या जाहिराती थांबवाव्यात. जर त्यांनी असं केलं नाही तर आम्हाला कारवाई करावी लागेल. नाहीतर पतंजलीच्या प्रत्येक चुकीच्या जाहिरातींवर एक कोटी रुपयांचा दंड आकारण्यात येईल.