केंद्रीय मंत्र्याचा प्रताप! अधिकाऱ्यांना दरवाजा लावून, हात मोडेपर्यंत मारहाण

केंद्रीय मंत्री विश्वेश्वर तुडू (Central Minister Vishweshwar Tudu) यांनी आढावा बैठकीत एका सरकारी अधिकाऱ्यावर हल्ला करून मारहाण केल्याचा गंभीर आरोप करण्यात आला आहे. या घटनेत एका अधिकाऱ्याचा हात तुटल्याचं समजतंय. या अधिकाऱ्याला रुग्णालयात दाखल करण्यात आलं असून, त्यांच्या हातावर उपचार करण्यात आल्याचं समजतंय. केंद्रीय मंत्री विश्वेश्वर तुडू यांचं मूळ गाव असणाऱ्या ओडिशातील बारीपाडामध्ये ही घटना घडली आहे. विश्वेश्वर तुडू हे केंद्र सरकारमध्ये आदिवासी व्यवहार आणि जलशक्ती राज्यमंत्री आहेत.

विश्वेश्वर तुडू हे मयूरभंजचे भाजप खासदार आहेत. गेल्या वर्षी जुलैमध्ये मंत्रिमंडळ विस्तारात त्यांना पंतप्रधान मोदींच्या मंत्रिमंडळात राज्यमंत्री पद मिळालं. केंद्रीय मंत्र्यांनी त्यांच्या कार्यालयात शुक्रवारी बैठक बोलावली होती. या बैठकीत जिल्हा नियोजन व संनियंत्रण विभागाचे उपसंचालक अश्विनीकुमार मलिक, सहायक संचालक देबाशिष महापात्रा यांना बोलावण्यात आलं होतं. त्यादरम्यान झालेल्या वादानंतर ही घटना घडली आहे.

आढावा बैठकीत मंत्री विश्वेश्वर तुडू एका गोष्टीवरून चांगलेच भडकले आणि त्यांनी दोन्ही अधिकाऱ्यांना आतून दरवाजा बंद करून खुर्चीने मारहाण केल्याचा आरोप करण्यात आला आहे. हे. या हल्ल्यात देबाशिष महापात्रा यांचा हात तुटला असून, अश्विनी कुमार मलिक जखमी झाले आहेत. दोन्ही अधिकाऱ्यांना बारीपाडा येथील पीआरएम मेडिकल कॉलेजमध्ये दाखल करण्यात आले आहे.