तो माझा अधिकार! लोकसभा अध्यक्षांनी राहुल गांधींना झापलं

नवी दिल्ली - अर्थसंकल्पीय अधिवेशनाच्या (Budget Session 2022) सुरुवातीला राष्ट्रपतींच्या अभिभाषणावर संसदेत बुधवारी चर्चा झाली. यावेळी काँग्रेसचे नेते खासदार राहुल गांधी (Rahul Gandhi) यांनी केंद्र सरकारसह पंतप्रधान नरेंद्र मोदी (Narednra Modi) यांच्यावर जोरदार टीका केली. दरम्यान, संसदेच्या कामकाजाच्या आचारसंहितेचं पालन योग्य रितीने करण्याबाबत सभापतींनी राहुल गांधींची शाळा घेतली. राहुल गांधी यांनी त्यांच्या भाषणावेळी मधेच दुसऱ्या एका खासदाराला बोलण्यासाठी मी परवानगी देतो असं म्हटलं. त्यावरून लोकसभा (Loksabha) अध्यक्ष ओम बिर्ला यांनी राहुल गांधींना फटकारलं.

अध्यक्ष ओम बिर्ला (Om Birla) यांनी म्हटलं की, 'असं मधेच बोलण्याची परवानगी देणारे तुम्ही कोण? तुम्ही परवानगी देऊ शकत नाही, तो माझा अधिकार आहे. कोणालाही परवानगी देण्याचा तुम्हाला अधिकार नाही. फक्त अध्यक्षांकडे हा अधिकार असतो.'

अभिभाषणावरील चर्चेदरम्यान, टीकेवेळी खासदार कमलेश पासवान यांचा उल्लेख राहुल गांधींनी केला. तेव्हा राहुल गांधींच्या बोलण्याला उत्तर देण्याचा प्रयत्न कमलेश यांनी केला. मात्र सभापतींनी त्यांना खाली बसण्यास सांगितले. त्यावर राहुल गांधी यांनी म्हटलं की, 'मी एक लोकशाही मानणारा व्यक्ती आहे. त्यामुळे दुसऱ्या व्यक्तीला बोलण्यास परवानगी देतो.' राहुल गांधींच्या या वक्तव्यानंतर अध्यक्षांनी त्यांना संसदेच्या कामकाजाच्या नियमाची आठवण करून देत असा अधिकार फक्त अध्यक्षांना असल्याचं सांगितलं.

राहुल गांधी केंद्र सरकारवर टीका करताना म्हणाले होते की, तुम्ही कोणाचं ऐकत नाही. अगदी भाजपमध्ये असलेल्यांचेसुद्धा ऐकत नाही. आज दलित सहकारी पासवान यांना बोलताना ऐकलं. ते बोलताना दबकत होते, अडखळत होते. त्यांनी माझ्याशी चर्चा केली आहे आणि मनातलं बोलले आहेत. मात्र ते चुकीच्या पक्षात आहेत असंही राहुल गांधी त्यांच्या भाषणात म्हणाले होते. यानंतर थोडावेळ सभागृहात गोंधळ झाला होता आणि राहुल गांधींनी पासवान यांना मधेच बोला माझी परवानगी आहे असं म्हटलं. त्यानतंर अध्यक्षांनी राहुल गांधींना झापलं.