Katraj Dairy Election: भगवान पासलकर वेल्ह्यातून बिनविरोध

पुणे : पुणे जिल्हा सहकारी दूध उत्पादक संघाच्या (कात्रज डेअरी) संचालक मंडळाच्या पंचवार्षिक निवडणुकीतून गुरुवारी (ता. २४) आणखी दोघा जणांनी माघार घेतली आहे. यामुळे कात्रज डेअरीचे विद्यमान संचालक भगवान पासलकर हे वेल्हे तालुका मतदारसंघातून बिनविरोध झाले आहेत. आता केवळ त्यांच्या निवडीची अधिकृत घोषणा बाकी राहिली आहे.(Katraj Dairy Election Updates)

यामुळे कात्रज डेअरीच्या संचालक मंडळाच्या १६ पैकी तीन जागा आतापर्यंत बिनविरोध झाल्या आहेत. वेल्हे तालुका मतदारसंघातील दोन उमेदवारांनी गुरुवारी माघार घेतली आहे. या मतदारसंघाच्या एक जागेसाठी तीन उमेदवार निवडणूक रिंगणात होते. यापैकी दोन उमेदवारांनी माघार घेतल्याने या मतदारसंघातून विद्यमान संचालक भगवान पवार यांचा एकमेव अर्ज शिल्लक राहिला आहे.

माणिक पासलकर आणि शोभा पासलकर या दोन उमेदवारांनी त्यांचे अर्ज माघारी घेतले आहेत. याआधी हवेली तालुका मतदारसंघातून म्हस्के यांनी माघार घेतली आहे. आतापर्यंत तीन जणांनी कात्रज डेअरीच्या निवडणूक रिंगणातून माघार घेतली आहे. यामुळे आता १६ जागांसाठी ८८ उमेदवार निवडणूक रिंगणात शिल्लक राहिले आहेत.

या निवडणुकीसाठीच्या उमेदवारी अर्जांची २२ फेब्रुवारीला छाननी झाली. तेव्हापासून येत्या ८ मार्चपर्यंत अर्ज माघारीसाठी मुदत आहे. त्यामुळे माघारीसाठी आणखी १२ दिवसांचा कालावधी शिल्लक आहे.