Satara Ganeshotsav : आनंदमयी पर्वाला दिमाखात सुरुवात; तब्बल दोन लाख 35 हजार 608 गणेशमूर्तींची भक्तिभावाने स्थापना

सातारा : लाडक्या गणरायाच्या स्वागतासाठी (Satara Ganeshotsav) संपूर्ण जिल्हा सज्ज होता. दिवसभरात मोठ्या उत्साहाने विविध कार्यालये, सार्वजनिक मंडळे तसेच घरगुती अशा तब्बल दोन लाख ३५ हजार ६०८ गणेशमूर्तींची मोठ्या भक्तिभावाने स्थापना करत जिल्हावासीयांनी आनंदोत्सवाला सुरुवात केली.

दहा दिवस संपूर्ण जिल्ह्यात चैतन्यमय वातावरण राहणार आहे. काल (मंगळवार) सकाळपासूनच गणेशमूर्ती (Ganesh Idol) आणण्यासाठी घरगुती व मंडळांच्या कार्यकर्त्यांची तयारी सुरू होती. उत्साहाच्या वातावरणात ढोल, ताशांच्या गजरात आज जिल्ह्यातील विविध भागांत गणरायाचे आगमन झाले.

जिल्ह्यामध्ये विविध संस्था व कार्यालयांमध्ये एक हजार २३० गणेशमूर्तींची प्राणप्रतिष्ठा करण्यात आली, तर दोन लाख २९ हजार ९३ घरांमध्ये घरगुती गणेशमूर्तींची स्थापना झाली. हा सर्व उत्सव शांततेत व आनंदात साजरा व्हावा, यासाठी जिल्हा पोलिसांनी जिल्ह्यातील सर्वच शहरे व गावातील मिरवणूक मार्गांवर तसेच गर्दीच्या ठिकाणांवर बंदोबस्त तैनात केला होता. साध्या वेशातील पोलिसही ठिकठिकाणी वावरत होते.

त्यामुळे रात्रीपर्यंत उत्सवामध्ये कोणताही अनुचित प्रकार घडल्याची माहिती नव्हती. जिल्ह्यामध्ये एकूण पाच हजार २८५ ठिकाणी सार्वजनिक गणेशोत्सवाला सुरुवात झाली. त्यातील अतिसंवेदनशील असलेल्या ३७ ठिकाणच्या गणेश उत्सवांच्या ठिकाणी पोलिसांनी जादाची कुमक पुरवली आहे. मिश्र वस्तीत असलेल्या ७७६ गणेश मंडळांवरही पोलिसांनी बारकाईने लक्ष ठेवले आहे. नागरिकांनी उत्साहाने उत्सवात सहभाग नोंदवावा, कोणताही अनुचित प्रकार टाळावा, असे आवाहन पोलिसांनी केले आहे.

५९६ एक गाव, एक गणपती

आनंदाचा हा उत्सव संपूर्ण गावामध्ये एकत्रपणे राबविला जावा, यासाठी पोलिस दलाचे विशेष प्रयत्न सुरू असतात. त्याला जिल्ह्यातील ५९६ गावांतील ग्रामस्थांनी सकारात्मक प्रतिसाद दिला आहे. त्यामुळे या गावांमध्ये ‘एक गाव, एक गणपती’ उपक्रम राबविला गेला आहे.