पाकिस्तानपाठोपाठ अफगाणिस्तानात पुराचा कहर; 180 जणांचा मृत्यू, 250 हून अधिक लोक जखमी

काबूल : पाकिस्तानपाठोपाठ (Pakistan) आता अफगाणिस्तानातही पुरामुळं (Rain Flood in Afghanistan) मोठ्या प्रमाणात नुकसान झाल्याच्या बातम्या समोर येत आहेत. संयुक्त राष्ट्र आणि सत्ताधारी तालिबानच्या (Taliban) म्हणण्यानुसार, एका महिन्याच्या हंगामी पावसामुळं अफगाणिस्तानमध्ये अचानक पूर आलाय. या भीषण पुरात किमान 182 लोकांचा मृत्यू झाला असून शेकडो लोक जखमी झाले आहेत.

तालिबानचे प्रवक्ते जबीहुल्ला मुजाहिद (Zabihullah Mujahid) म्हणाले, 'अचानक आलेल्या पुरात 250 हून अधिक लोक जखमी झालेत, तर 3,000 हून अधिक घरं उद्ध्वस्त झाली आहेत. 16 ऑगस्ट ते 21 ऑगस्ट दरम्यान किमान 182 लोक मरण पावले असून या 4 दिवसांत अचानक आलेल्या पुरानं 63 जणांचा बळी घेतलाय.'

पुरात जनावरं, घरं आणि शेतजमीन नष्ट

युनायटेड नेशन्सच्या म्हणण्यानुसार, इतर 30 जण बेपत्ता आहेत. त्याच वेळी 13 प्रांतातील 8,200 हून अधिक कुटुंबांना पुराचा फटका बसलाय. अलीकडं पूर्व लोगर प्रांतातील खुशी जिल्ह्यातील गावकऱ्यांनी सांगितलं की, या प्रदेशात प्रथमच पूर आला आणि जनावरं, घरं आणि शेतजमीन नष्ट झाली. लोकांना आपली घरं सोडावी लागली आहेत. सर्व लोक डोंगरात आश्रय घेत आहेत.

34 प्रांतांमध्ये आणखी पावसाची शक्यता

उत्तर परवान प्रांतातील तीन प्रभावित जिल्ह्यांमध्ये अचानक आलेल्या पुरात डझनभर घरं वाहून गेली. येत्या काही दिवसांत अफगाणिस्तानच्या बहुतांश 34 प्रांतांमध्ये आणखी पावसाची शक्यता असल्याचा इशारा स्थानिक हवामान खात्यानं (Meteorology Department) दिलाय. देशभरात मुसळधार पाऊस आणि अचानक आलेल्या पुरामुळं जुलैमध्ये 40 लोक आणि महिन्यापूर्वी 19 लोकांचा मृत्यू झाला होता.