शंभरहून अधिक पाकिस्तानी सैनिक ठार? बलुच बंडखोरांचा दावा

बलुचिस्तान लिबरेशन आर्मी (Balochistan Liberation Army) या दहशतवादी संघटनेने गुरुवारी पाकिस्तानमधील दोन लष्करी छावण्यांमध्ये १०० हून अधिक सैनिक मारल्याचा दावा केला आहे. तर पंजगूर (Panjgur) आणि नुष्की (Nushki) या दोन्ही ठिकाणी बलुच बंडखोरांचा हा हल्ला हाणून पाडण्यात आल्याचं पाकिस्तानी लष्करानं एका निवेदनाद्वारे जाहीर केलंय.

या हल्ल्यात बंडखोरांचं मोठं नुकसान झाल्याचा दावा पाकिस्तानी लष्करानं केलाय. दहशतवाद्यांनी पंजगूर भागातील सुरक्षा दलाच्या छावणीत घुसण्याचा प्रयत्न केला. परंतु वेळीच प्रत्यूत्तर देत हा हल्ला उधळून लावल्याचे पाकिस्तानी लष्करानं (Pakistan Armed Forces) म्हटलंय.

बलुच लिबरेशन आर्मीने असाही दावा केला आहे की पाकिस्तानने आपल्या प्रसारमाध्यमांना घटनांचे वार्तांकन करण्यास बंदी घातली होती आणि इंटरनेट (Internet) आणि फोन बंद केले होते. बलुच लिबरेशन आर्मीने असे म्हटले आहे की पाकिस्तानी लष्कराने हा हल्ला परतवून लावल्याचा दावा खोटा आहे.