भूकंपामुळे तुर्की हादरले; इमारती जमीनदोस्त, 17 जणांचा मृत्यू

अंकारा - तुर्कस्तानात झालेल्या शक्तीशाली भूकंपामुळे मोठा विध्वंस झाला आहे. तब्बल 7 रिश्टर स्केल इतकी भूकंपाची तीव्रता होती. या भूकंपाचा सर्वात मोठा धक्का इजमिर शहराला बसला असून प्रचंड नुकसान झालं आहे. यामध्ये 17 जणांचा मृत्यू झाला असून 700 हून अधिक लोक जखमी झाले आहेत. अनेक इमारती पत्त्याप्रमाणे कोसळल्या आहेत.

भूकंपाचे केंद्र एजियर समुद्रात असल्याचं सांगण्यात आलं आहे. तसंच भूकंपामुळे त्सुनामीचा धोकाही वाढला आहे. तुर्कस्तानच्या आपत्ती निवारण कक्षाने बचावपथकांना भूकंपाचे धक्के बसलेल्या भागात पाठवलं आहे.

युरोपियन-मेडिटेरेनियन सिस्मॉलॉजिकल सेंटरच्या (ईएमएससी) माहितीनुसार, भूकंपाची तीव्रता 6.9 रिश्टर स्केल इतकी होती. समोसच्या ग्रीक बेटांपासून 13 किमी अंतरावर भूकंपाचे केंद्र होते. तुर्कस्तानच्या आपत्ती व्यवस्थापन कक्षाच्या अध्यक्षांनी सांगितले की, भूकंपाची तीव्रता 6.6 रिश्टर स्केल इतकी आहे. तर याचे केंद्र 16.5 किमी खोल इतकं आहे. 

हे वाचा - न्यूझीलंडमध्ये सार्वमत इच्छामरणाच्या बाजूने

सोशल मीडियावर तुर्कस्तानमधील भूकंपनानंतरच्या विदारक परिस्थितीचे व्हिडिओ आणि फोटो व्हायरल होत आहेत. यातील अनेक व्हिडिओ हे भीतीदायक असे असून भूकंपानंतर समुद्र किनाऱ्यांवर पाणी दिसेनासं झालं आहे. तसंच काही ठिकाणी त्सुनामी आणि पूरही आल्याचं सांगण्यात येत आहेत .