दहशतवादी निज्जरच्या हत्येप्रकरणी आणखी एका भारतीयाला अटक, कॅनडा पोलिसांनी आतापर्यंत ४ जणांना घेतलं ताब्यात

Hardeep Singh Nijjar Killing: खलिस्तानी दहशतवादी हरदीपसिंग निज्जरच्या हत्येप्रकरणी कॅनडाच्या पोलिसांनी चौथ्या भारतीयाला अटक केली आहे. हत्येप्रकरणी अटक करण्यात आलेल्या चौथ्या आरोपीवर यापूर्वीच शस्त्र तस्करीच्या गुन्ह्यात पोलिस कोठडीत असलेल्या निज्जरच्या हत्येचा आणि कट रचल्याचा नव्याने आरोप ठेवण्यात आल्याचे पोलिसांनी शनिवारी सांगितले आहे. याआधी कॅनडाच्या पोलिसांनी आणखी तीन भारतीयांनाही अटक केली होती.

कॅनेडियन पोलिसांचे तपास पथक, इंटिग्रेटेड होमिसाईड इन्व्हेस्टिगेशन टीम (IHIT) ने सांगितले की त्यांनी अमनदीप सिंग नावाच्या व्यक्तीला अटक केली आहे आणि त्याच्यावर कॅनेडियन नागरिक हरदीप सिंग निज्जरच्या हत्येचा कट रचल्याचा आरोप ठेवला आहे. याप्रकरणी कॅनडाच्या पोलिसांनी यापूर्वीच करण ब्रार, कमलप्रीत सिंग आणि करणप्रीत सिंग यांना अटक केली आहे.

आयएचआयटीने सांगितले की, अमनदीप सिंग, ब्रॅम्प्टन, सरे आणि ॲबॉट्सफोर्ड येथे राहणारा 22 वर्षीय भारतीय माणूस आधीच ओंटारियोमध्ये पोलिसांच्या ताब्यात होता. आता त्याच्यावर निज्जरच्या हत्येच्या कटाला पाठिंबा दिल्याचा आरोप आहे. तसेच अन्य तीन आरोपींप्रमाणेच अमनदीपवरही हत्येचे गंभीर आरोप आहेत.

कॅनडातील सरे येथील गुरुद्वाराबाहेर हरदीप सिंग निज्जर याची गोळ्या झाडून हत्या करण्यात आली होती. भारतातील वॉन्टेड दहशतवाद्यांच्या 40 नावांच्या यादीत निज्जरचा समावेश होता. ज्याच्या आधारे कॅनडाच्या सरकारने भारतावर निज्जरच्या हत्येचा आरोप केला.

निज्जरच्या हत्येबाबत कॅनडाच्या सरकारने केलेल्या आरोपानंतर दोन्ही देशांमधील राजनैतिक संबंधही तणावपुर्ण झाले होते. भारताने जस्टिन ट्रुडो सरकारकडे या हत्याकांडात भारताच्या सहभागाचे पुरावे मागितले आहेत. ट्रुडो यांच्यावर कॅनडात भारताच्या नावावर व्होट बँकेचे राजकारण केल्याचा आरोप आहे.