चहा कमी प्या,अर्थव्यवस्था वाचवा; पाकिस्तानचं नागरिकांना आवाहन

सध्या पाकिस्तान आर्थिक संकटाचा सामना करतोय पाकिस्तानची अर्थव्यवस्था डगमगली असून सरकार ती रुळावर आणण्यासाठी पुरेपूर प्रयत्न करताहेत. मंगळवारी एका मंत्र्याने देशाची अर्थव्यवस्था मार्गावर आणण्यासाठी चहाचे सेवन कमी करण्याचे पाकिस्तानी नागरीकांना आवाहन केले. यातून पाकिस्तान सरकारची हतबलता आणि चिडचिड पुन्हा एकदा समोर आली.

सध्या या मंत्र्याचा व्हिडीओ सोशल मीडियावर प्रचंड व्हायरल होत असून नेटकरी पाकिस्तानला ट्रोल करत आहे.

एका पत्रकार परिषदेत मंत्री अहसान इक्बाल यांनी देशाच्या अर्थव्यवस्थेला वाचवण्यासाठी नागरिकांना एक कप चहा कमी करण्याचे आवाहन केले.सध्या हे प्रकरण सोशल मीडियावर प्रचंड गाजत आहे.

पाकिस्तान मोठ्या संकटाचा सामना करत आहे. दहशतवाद, मध्यंतरी दीर्घकाळ चालणारे राजकीय संकट होते तर आता हे आर्थिक संकट आहे.या संकटात त्यांचा जवळचा मित्र चीन देखील मदत करण्यात अयशस्वी ठरलाय.

सध्या देश गंभीर आर्थिक मंदीच्या दिशेने असताना पाकिस्तान समोर कर्जफेड करण्याच्या अनेक समस्या आहेत. यात या पाकिस्तानी मंत्र्याने चहा पिण्यावर मर्यादा घालण्यासाठी केलेल्या विधानाचे व्हिडिओ फुटेज काही वेळातच व्हायरल झाले यावर आता नेटिझन्स सोशल मीडियावर पाकिस्तानच्या सत्ताधारकांची थट्टा उडवत आहे.