Jalgaon MIDC News : चिंचोली-पिंपळे, कुसंबे येथे अतिरिक्त ‘एमआयडीसी’; लवकरच अध्यादेश

Jalgaon MIDC News : चिंचोली व कुसंबे (ता. जळगाव) येथे अतिरिक्त औद्योगिक क्षेत्र (एमआयडीसी) उभारण्यास मान्यता मिळावी, यासाठी पालकमंत्री गुलाबराव पाटील यांनी उद्योगमंत्री उदय सामंत यांच्याबरोबर मंत्रालयात बैठक घेतली.

त्यात जळगाव येथे जळगाव ‘एमआयडीसी’चा वाढता विस्तार पाहता चिंचोली-पिंपळे व कुसंबे येथे अतिरिक्त औद्योगिक वसाहत उभारण्यास मंत्री सामंत यांनी मंजुरी दिली. (Additional MIDC to Chincholi Pimple Kusumbe jalgaon news)

जळगाव जिल्ह्याच्या उद्योग क्षेत्राला उभारी देणारे महत्त्वाचे विषयही या बैठकीत मार्गी लागले आहेत. याबाबत मंत्री पाटील यांनी शासन दरबारी वेळोवेळी पाठपुरावा केला होता. अतिरिक्त एमआयडीसी उभारण्यास मान्यता दिल्याने रोजगार निर्मितीचा मार्ग मोकळा झाला आहे. लवकरच याबाबत अध्यादेश निघेल.

पालकमंत्री पाटील यांच्या अध्यक्षतेखाली ४ जानेवारी २०२२ ला झालेली आढावा बैठक व जळगाव उद्योग क्षेत्रातील विविध संघटना यांनी जळगाव औद्योगिक क्षेत्रालगत नवीन जागा भूसंपादन, चिंचोली व कुसंबे येथे अतिरिक्त औद्योगिक वसाहत स्थापन करण्यास मान्यता मिळावी, अशी मागणी केली होती.

हेही वाचा : Credit Card फसवणूक....काय घ्याल काळजी?

जळगाव औद्योगिक क्षेत्रालगत प्रस्तावित अतिरिक्त जळगाव औद्योगिक क्षेत्र टप्पा क्रमांक एक स्थापन करण्याबाबत जिल्हाधिकाऱ्यांकडील आढावा बैठकीनुसार कुसंबे खुर्द व चिंचोली येथील प्रस्तावित क्षेत्राची प्रादेशिक अधिकारी, उपरचनाकार, उपअभियंता जळगाव व भूमापक यांच्यामार्फत प्राथमिक स्थळ पाहणी करून आणि पालकमंत्री पाटील यांच्या मागणीनुसार व उद्योगमंत्र्यांच्या निर्देशानुसार महाराष्ट्र औद्योगिक विकास मंडळाचे प्रादेशिक अधिकारी (धुळे) यांनी महाव्यवस्थापक महाराष्ट्र औद्योगिक विकास मंडळ मुख्यालय (मुंबई) यांना मौजे कुसंबे खुर्द, चिंचोली येथे एमआयडीसी स्थापन करण्याबाबत प्रस्ताव सादर केला होता.