आईच्या शेतावरून पेटली भावंडात ‘भाऊबंदकी’; नातवाने गमावले प्राण | Sakal
sakal

बोलून बातमी शोधा

Fighting

आईच्या शेतावरून पेटली भावंडात ‘भाऊबंदकी’; नातवाने गमावले प्राण

जळगाव : शेतीच्या वादातून झालेल्या प्राणघातक हल्ल्यात तरुणाचा उपचारादरम्यान गुरुवारी (ता. १२) मृत्यू झाला. जिल्हा शासकीय रुग्णालयात नातेवाइकांनी एकच गर्दी केली होती.

एरंडोलच्या मारोती मढी येथे आबा भगवान महाजन पत्नी व दोन मुलांसह वास्तव्यास असून त्यांना, सुरेश, तुकाराम आणि मगन असे तीन भाऊ आहेत. त्यांच्या आईच्या हिस्स्याचे शेत जो मुलगा करेल त्याने त्यांना वर्षांला १५ हजार रुपये द्यायचे, असे कौटुंबिक बैठकीत ठरविले होते.

याच शेताच्या वादातून आबा महाजन यांचे सुरेश, तुकाराम आणि मगन या तिघा भावांशी गुरुवारी (ता. १२) वाद उफाळून आला. वादाचे रूपांतर हाणामारीत होऊन आबा महाजन यांना भाऊबंदकीत मारहाण होत असल्याचे ऐकून त्यांचा मोठा मुलगा उमेश तिथे आला. याचा राग आल्याने सुरेश, तुकाराम, मगन व तुकारामचा मुलगा मनोज आणि पत्नी उषाबाई यांनी आबा महाजन आणि उमेश महाजन यांना लाठ्याकाठ्यांनी बेदम मारहाण केली. उमेशच्या गुप्तांगावर वार झाल्याने तो गंभीर जखमी झाला. तातडीने त्याला एरंडोल ग्रामीण रुग्णालयात नेले. मात्र, प्रकृती गंभीर असल्याने वैद्यकीय अधिकाऱ्यांनी जखमीला जळगावला हलविण्याचा सल्ला दिला. दुपारी एकला बेशुद्धावस्थेत उमेशला घेऊन कुटुंब जिल्हा सामान्य रुग्णालय व शासकीय वैद्यकीय महाविद्यालयात दाखल झाले. जिल्‍हा रुग्णालयात उपचार सुरू असताना, सायंकाळी त्याचा मृत्यू झाला. उमेशचा मृत्यू झाल्याचे कळताच कुटुंबियांनी एकच आक्रोश केला.

हेही वाचा: 5 बहिणींच्या एकुलत्या एक भावावर काळाचा घाला; कुटुंबाला आक्रोश अनावर

संशयितांच्या अटकेसाठी संताप

उमेश महाजन याचा मृत्यू झाल्याने नातेवाइकांनी जिल्हा रुग्णालयात गर्दी केली. विच्छेदनासाठी मृतदेह रवाना केल्यानंतर मृताचा भाऊ नीलेश याने शवविच्छेदनाला नकार देत अगोदर संशयितांना अटक करा, अन्यथा मृतदेह ताब्यात घेणार नाही, असा पावित्रा घेतल्याने रात्री उशिरापर्यंत मृतदेहाचे शवविच्छेदन होऊ शकले नाही. रात्री दहापर्यंत एरंडोल पोलिसांत गुन्हा दाखल करण्याचे काम सुरू असल्याचे निरीक्षक ज्ञानेश्वर जाधव यांनी ‘सकाळ’शी बोलताना सांगितले. उमेशच्या मागे आई सुनीता, वडील आबा महाजन, भाऊ नीलेश, पत्नी मयुरी, बहीण रूपाली असा परिवार आहे.

हेही वाचा: ''पिंटूमामाने घरात बोलावून केले असे...'' अल्पवयीनने मांडला घटनाक्रम

Web Title: Fighting Of Brothers Over Agricultural Land Disputes In Jalgaon

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :Jalgaon
go to top