जळगाव : पूर्वमोसमी पावसाची हजेरी; वादळासह तुरळक पाऊस

जळगाव : मॉन्सूनच्या पावसाने (Pre Monsoon Rain) राज्यात हजेरी लावली असली तरी जळगावात अद्याप त्याची प्रतीक्षाच असताना रविवारी जळगाव शहरासह परिसरात वादळी वाऱ्यासह तुरळक पावसाने हजेरी लावली. जोरदार पावसाची अपेक्षा असताना किरकोळ पावसामुळे वातावरणातील उकाडा (Heat) अधिकच वाढला. (pre monsoon rains thunderstorms in jalgaon news)

गेल्या तीन- चार दिवसांपासून जळगाव जिल्ह्यातील काही भागात वादळी पावसाने केळीबागा, पिकांचे नुकसान झाले. मात्र, जळगाव शहरात तो बरसत नव्हता. शनिवारी पावसाचे वातावरण तयार झाले, मात्र तो सडा टाकूनच परतला. रविवारी पुन्हा दुपारी दोन वाजेपासून आकाशात ढगांनी गर्दी करायला सुरवात गेली. उन्हाळ्याच्या तीव्रतेत होरपळणाऱ्या जळगावकरांना चांगल्या पावसाची प्रतीक्षा होती.

वादळी वाऱ्यासह पाऊस

दुपारपासून जळगाव शहरात पावसाचे वातावरण तयार झाले. आणि साडेतीनच्या सुमारास वादळी वाऱ्यासह पावसाला सुरवात झाली. पंधरा ते वीस मिनिटे तुरळक पावसाने हजेरी लावली. असे असले तरी शहरातील काही भाग मात्र कोरडाच राहिल्याचे दिसून आले. ठराविक भागातच पाऊस झाला. वादळी पावसाने शहरातील काही भागातील वीजपुरवठा खंडित झाला. सायंकाळपर्यंत या भागात वीजपुरवठा सुरळीत झाला नव्हता.

उकाडा वाढला

काहीवेळ तुरळक स्वरुपाच्या सरी पडल्यानंतर तेवढ्या वेळेपुरता उकाड्यापासून दिलासा मिळाला. मात्र, पाऊस थांबल्यानंतर वातावरणातील उकाडा वाढला. येणाऱ्या दोन- तीन दिवसांत जळगाव जिल्ह्यात जोरदार पावसाचा अंदाज वर्तविण्यात आला आहे.