Jalgaon News | पायाभूत सोयी-सुविधांना प्राधान्य द्या : जिल्हाधिकारी अमन मित्तल

जळगाव : जिल्हा वार्षिक योजनेच्या माध्यमातून विकासकामे करताना पायाभूत सोयी-सुविधांच्या बळकटीकरणाबरोबरच वीज, आरोग्य, शिक्षण, दळण-वळणाच्या सुविधांना प्राधान्य द्यावे. ज्या विभागांनी अद्याप प्रशासकीय मान्यतेसाठी प्रस्ताव सादर केलेले नाहीत. त्यांनी तांत्रिक मान्यता घेऊन प्रस्ताव सादर करावेत. (Prioritize infrastructure Collector Aman Mittal say in District Planning Committee meeting Jalgaon News)

प्रशासकीय मान्यता प्राप्त झालेल्या कामांची वर्कऑर्डर देऊन कामे सुरू करावीत. मागील वर्षातील अपूर्ण कामे वेळेत पूर्ण करावीत. कोणत्याही विभागाचा निधी अखर्चित राहणार नाही, याचीही सर्व विभागप्रमुखांनी दक्षता घ्यावी, अशा सूचना जिल्हाधिकारी तथा जिल्हा नियोजन समितीचे सदस्य सचिव अमन मित्तल यांनी मंगळवारी (ता. ३१) येथे दिल्या.

जिल्हाधिकारी कार्यालयातील जिल्हा नियोजन सभागृहात झालेल्या जिल्हा वार्षिक योजनेच्या आढावा बैठकीत अध्यक्षस्थानावरून ते बोलत होते.

हेही वाचा : T+1 Settlement मुळे वाढेल शेअर बाजारातली उलाढाल

जळगावचे उपवन संरक्षक विवेक होशिंग, जिल्हा नियोजन अधिकारी प्रतापराव पाटील, समाजकल्याण विभागाचे सहाय्यक आयुक्त योगेश पाटील, यावल एकात्मिक आदिवासी विकास प्रकल्प अधिकारी विनिता सोनवणे आदी उपस्थित होते.

जिल्हाधिकारी मित्तल म्हणाले, की शासकीय यंत्रणांनी विहित कालावधीत विकासकामे पूर्ण होण्यासाठी परिपूर्ण प्रस्ताव सादर करावेत. नवीन कामे विहित कालमर्यादेत पूर्ण होतील, याचेही नियोजन करावे.

उपलब्ध निधीचे व्यवस्थित नियोजन करून जिल्हा वार्षिक योजनेंतर्गत करावयाच्या विविध विकासकामांना शासकीय यंत्रणांनी तातडीने तांत्रिक मान्यता घेवून प्रशासकीय मान्यतेसाठी प्रस्ताव सादर करावे.

या वेळी जिल्हा वार्षिक योजनेतंर्गत सर्वसाधारण, आदिवासी घटक कार्यक्रम, विशेष घटक योजना आदींचा विभागनिहाय सविस्तर आढावा घेतला. जिल्हा नियोजन अधिकारी पाटील म्हणाले, की प्रशासकीय मान्यता घेऊन सुरू झालेल्या कामांसाठी त्या विभागांनी निधीची मागणी करावी.

ज्या विभागांचा निधी विहित कालावधीत खर्च होणार नाही, त्यांनी निधी परत करावा, जिल्हा वार्षिक योजनेच्या खर्चाचे उपयोगीता प्रमाणपत्र शासकीय यंत्रणांनी तातडीने सादर करावे. सर्व शासकीय यंत्रणांनी आपले प्रस्ताव पाठविताना आय-पास संगणक प्रणालीचा वापर करावा.