Jalgaon News : पाचोरा तहसीलमधून चोरीस गेलेले वाळूचे डंपर जप्त

जळगाव : पाचोरा तहसील कार्यालयाच्या आवारातून चोरीला गेलेले वाळू वाहतुकीचे डंपर जळगाव शहरातील ओम ऑटो सेंटर येथे आढळले असून, जळगाव स्थानिक गुन्हे शाखेच्या पथकाने शुक्रवारी (ता. ६) डंपर ताब्यात घेतले.

अवैध वाळू वाहतूक करणारे डंपरवर (एमएच १९ झेड ४४३१) ५ ऑक्टोबर २०२२ ला पाचोरा महसूल पथकाने कारवाई करून डंपर पाचोरा तहसील कार्यालयाच्या आवारात लावले होते. १२ डिसेंबरला जमा केलेले वाळूचे डंपर चोरट्यांनी चोरून नेले होते. याबाबत पाचोरा पोलिस ठाण्यात गुन्हा दाखल झाला होता. (Stolen sand dumper from Pachore Tehsil seized by revenue department Jalgaon News)

हेही वाचा : द मिसिंग टाइल सिंड्रोम ठेवा आपल्यापासून दूर

गुन्हा दाखल झाल्यानंतर स्थानिक गुन्हे शाखेचे पोलिस निरीक्षक किसन नजन पाटील यांनी डंपरचा शोध घेण्याच्या सूचना दिल्या होत्या. त्यानुसार पथकातील हवालदार अशरफ शेख, पोलिस नाईक लक्ष्मण पाटील, रणजित जाधव, विनोद पाटील, किशोर राठोड यांना कारवाईसाठी रवाना केले.

ते डंपर जळगाव शहरातील ओम ऑटो सेंटर येथे प्लॅस्टिकच्या ताडपत्रीने झाकला असल्याची माहिती मिळाली. त्यावरून पथकाने घटनास्थळी जाऊन चोरीला गेलेले डंपर ताब्यात घेतले व पुढील कारवाईसाठी पाचोरा पोलिसांच्या ताब्यात दिले आहे.