रत्नागिरी : टँकर धावताहेत तहानलेल्या गावांत

रत्नागिरी: संगमेश्‍वरमधील एक आणि मंडणगडमधील तीन धरणांतील साठा दुरुस्तीसाठी सोडून देण्याचा निर्णय घेतल्याने त्यावर अवलंबून असलेल्या सुमारे ३९ वाड्यांना टँकरने पाणीपुरवठा करावा लागत आहे. त्यामुळे जिल्ह्याच्या टंचाईग्रस्त वाड्यांमध्ये भर पडली. सध्या ६४ गावांतील ११७ वाड्यांना १० टँकरद्वारे पाणी पुरविले जात आहे. १८ हजार ७६६ लोकांना टँकरचा आधार आहे.

यंदा मान्सून लवकर दाखल होण्याची शक्यता हवामान विभागाकडून वर्तवण्यात आली असली तरीही अजून उन्हाचा कडाका जाणवत आहे. त्यामुळे भूजल पातळी खालावलेली असून विहिरी, तळी या पाण्याच्या स्रोतांमध्ये खडखडाट आहे. परिणामी जिल्ह्यातील पाणीटंचाईत वाढ होत आहे. पाणी मिळत नसल्याने टँकरचा आधार ग्रामस्थांकडून घेतला जात आहे. ही परिस्थिती उद्भवलेली असतानाच पावसाळ्यापूर्वीच्या दुरुस्तीसाठी काही धरणातील पाणीसाठा कमी करण्यात येत आहे. संगमेश्‍वर तालुक्यातील उमरे येथील पाणी सोडण्यात आले आहे तर मंडणगड तालुक्यातील भोळवली, चिंचाळ, पणदेरी या क्षेत्रातील पाणी कमी झाल्यामुळे त्यावर आधारित नळयोजनांचे पाणी बंद झाले आहे. ऐन उन्हाळ्यात तेथील ग्रामस्थांना पाणीटंचाईला सामोरे जावे लागत आहे.

यंदा जलजीवन मिशनमुळे टंचाई आराखड्यात मोठी घट झाली होती; परंतु मानवनिर्मिती कारणांमुळे टंचाईग्रस्त वाड्यांची आकडेवारी वाढली आहे.गतवर्षी याच कालावधीत ६४ गावांतील १०६ वाड्यांना टँकरने पाणी पुरवले जात होते. यंदा ११७ वाड्यांना टँकरचा आधार आहे. आतापर्यंत ६१५ टँकरच्या फेऱ्‍या झाल्या असल्याचे पाणी पुरवठा विभागाकडून सांगण्यात आले.

त्या वृत्ताला अधिकाऱ्‍यांचा दुजोरा

उमरेतील एका धरणावर ११ वाड्या तर मंडणगडमधील तीन धरणांवर २८ वाड्यांचा पाणीपुरवठा अवलंबून होता. धरणातील पाणी कमी झाल्याच्या वृत्ताला जिल्हा परिषद पाणी पुरवठा विभागाच्या अधिकाऱ्‍यांनी दुजोरा दिला आहे. तेथील लोकांची गैरसोय टाळण्यासाठी टँकरने पाणी सुरू केले आहे. तशी मागणी तेथील ग्रामस्थांकडून केली होती.

तालुका गाव वाडी लोकं

मंडणगड १२ ३४ ७०९९

दापोली २ ६ १३५४

खेड १२ १६ १४७०

चिपळूण १८ २६ २४४२

संगमेश्‍वर १४ २४ ४४७५

रत्नागिरी १ ५ १३७३

लांजा ५ ६ ५५३