Ind vs Eng : कसोटी क्रिकेटमध्ये R Ashwinने रचला इतिहास! 'ही' कामगिरी करणारा ठरला पहिला आशियाई खेळाडू

Ind vs Eng 4th Test R Ashwin Record : इंग्लंडसोबत खेळल्या जात असलेल्या चौथ्या कसोटी सामन्यात टीम इंडियाने शानदार सुरुवात केली आहे. पहिल्या सत्रात भारताने 5 विकेट्स घेत इंग्लंडला बॅकफूटवर ढकलले.

यादरम्यान रविचंद्रन अश्विनने जॉनी बेअरस्टोची विकेट घेत इतिहास रचला आहे. अश्विन हा इंग्लंडविरुद्ध 1000 कसोटी धावा आणि 100 बळी घेणारा पहिला आशियाई क्रिकेटपटू ठरला आहे. हा पराक्रम यापूर्वी कोणीही करू शकले नव्हते.

भारत आणि इंग्लंड यांच्यातील मालिकेतील चौथा कसोटी सामना रांची येथे खेळला जात आहे. जिथे, पदार्पण करणाऱ्या आकाशदीपने विकेट घेण्यास सुरुवात केली आणि 3 इंग्लिश फलंदाजांना बाद केले. यानंतर रविचंद्रन अश्विनने 38(35) च्या स्कोअरवर जॉनी बेअरस्टोला LBW बाद करून पॅव्हेलियनचा रस्ता दाखवला. बेअरस्टोला बाद करून अश्विनने मोठी कामगिरी केली आहे. होय, अश्विन इंग्लंडविरुद्ध 100 विकेट आणि 1000 कसोटी धावा करणारा पहिला आशियाई क्रिकेटपटू ठरला आहे.

भारत आणि इंग्लंड यांच्यात सुरू असलेल्या रांची कसोटीत नाणेफेक जिंकल्यानंतर बेन स्टोक्सने प्रथम फलंदाजी करण्याचा निर्णय घेतला. पण, हा निर्णय इंग्लिश कर्णधारावर उलटताना दिसत आहे, कारण पहिले सत्र पूर्णपणे भारताच्या नावावर होते. लंचपर्यंत इंग्लंडचा स्कोअर 112/5 आहे. आता जर इंग्लंडला या सामन्यात टिकून राहायचे असेल तर त्यांना दुसऱ्या सत्रात कोणत्याही किमतीत पुनरागमन करावे लागेल.